Ўзбекистон ва Тожикистон янги автотранспорт йўналишларини очишни режалаштирмоқда
Ўзбекистон ва Тожикистон транспорт соҳаси идоралари раҳбарлари ўртасида бўлиб ўтган учрашувда икки томонлама ҳамкорликни мустаҳкамлаш, шу жумладан, янги автотранспорт йўналишларини очиш масаласи муҳокама қилинди. Бу ҳақда Тожикистон Транспорт вазирлигига таяниб, «Asia Plus» хабар берди.
Тожикистон транспорт вазири Азим Иброҳим ва Ўзбекистон транспорт вазирининг биринчи ўринбосари Илҳом Маҳкамов ўртасидаги учрашув Душанбе шаҳрида бўлиб ўтди. Ўзбекистоннинг расмий делегацияси айни пайтда Тожикистон пойтахтида бўлиб турибди.
Ўзбекистон Транспорт вазирлиги томонидан маълум қилинишича, учрашувда икки мамлакат ўртасида юк ва йўловчи ташувлари узлуксизлигини таъминлаш, хусусан, давлатлар ўртасида юк ташувлари ҳажмини ошириш, темир йўл соҳасидаги ҳамкорлик ҳамда янги автотранспорт йўналишларини очиш масалалари муҳокама қилинди. Янги йўналишларнинг қачон очилиши маълум қилинмаган.
Тожикистон транспорт вазири Азим Иброҳим сўнгги ойларда дунёда кузатилаётган коронавирус пандемияси билан боғлиқ вазият автотранспорт қатнови ҳар бир давлатнинг ижтимоий-иқтисодий ривожланишида муҳим аҳамиятга эга эканлигини кўрсатди. Айнан шунинг учун ҳам ушбу йўналишдаги ҳамкорликни янада кенгайтириш лозимлиги таъкидланди.
«Учрашувда томонлар ҳамкорликни янада ривожлантириш юзасидан конструктив таклифлар билдирди», — дейилади Ўзбекистон Транспорт вазирлиги хабарида.
«Asia Plus»нинг ёзишича, 18 сентябрь куни Душанбе шаҳрига 172 кишидан иборат Ўзбекистоннинг бизнес делегацияси мамлакат ҳукуматининг иқтисодий блоки ходимлари раҳбарлигида етиб борган.
Эслатиб ўтамиз, Тожикистон ва Ўзбекистон савдо-иқтисодий ва ижтимоий-маданий ҳамкорлик бўйича ҳукуматлараро қўшма комиссиясининг навбатдаги йиғилиши 28–29 сентябрь кунлари Душанбеда бўлиб ўтиши режалаштирилган. Йиғилиш доирасида Ўзбекистон бош вазири Абдулла Арипов ва Тожикистон бош вазири Қоҳир Расулзода икки давлат ўртасида март ойининг ўрталарида коронавирус инфекцияси тарқалиши сабабли ёпилган чегараларни очиш ва парвозларни тиклаш бўйича масалаларни муҳокама қилиши кўзда тутилган.
