Икки кишини 2013 йилда Қозоғистонда қурилишда ишлашга мажбур қилган қидирувдаги сурхондарёлик эркак қўлга олинди

Ўзбекистон фуқароларини 2013 йилда Қозоғистонга олиб бориб, қурилишда ишлашга мажбур қилган ва бу қилмиши учун қидирувда бўлган сурхондарёлик 59 ёшли эркак Қозоғистонда қўлга олинди ва тегишли чора кўриш учун Ўзбекистонга олиб келинди. Бу ҳақда Тошкент шаҳар ИИББ хабар берди.

Маълум қилинишича, 2013 йилнинг охирида Тошкент шаҳар ҳуқуқни муҳофаза қилувчи органларига фуқаро Э.Э. ва Ф.П.дан ариза келиб тушган. Аризада мазкур фуқаролар 2013 йилнинг август ойи охирида уларга Қозоғистоннинг Чимкент шаҳрида катта маош тўланадиган иш таклиф қилган бир гуруҳ шахсларга нисбатан чора кўришни сўраган.

Ўзларини «Мустақил мардикорлар ташкилоти» вакиллари сифатида таништирган шахслар Э.Э. ва Ф.П.га қонуний ишга жойлаштиришни ваъда қилган ва уларни Чимкент шаҳрига олиб кетган. Чимкентга етиб боргач, уларнинг паспортлари олиб қўйилган ва қурилишда ишлашга мажбур қилиниб, ваъда қилинган маош тўланмаган.

Тошкент шаҳар ИИББ Тергов бошқармаси томонидан 2013 йилнинг 19 декабрь куни жабрланувчиларнинг аризаларига асосан Ўзбекистон Республикаси Жиноят кодексининг 135-моддаси 2-қисми «б» банди (икки ёки ундан ортиқ шахсга нисбатан содир этилган одам савдоси) бўйича жиноий иш қўзғатилган.

Дастлабки тергов давомида мазкур жиноятни содир этганликда гумонланувчи шахслар аниқланган. Улар сурхондарёлик 1961 йилда туғилган Хуррам Б., Нураддин Д. ва Фахриддин Т. бўлган. Нураддин Д. ва Фахриддин Т. жиноий жавобгарликка тортилиб, тегишли жазоларга ҳукм этилган. Хуррам Б. нисбатан 2014 йилнинг январь ойида қидирув эълон қилинган.

Тошкент шаҳар ИИББнинг хабар беришича, 2020 йилнинг февраль ойида Хуррам Б.нинг турар жойи аниқланди ва Қозоғистон ҳуқуқни муҳофаза қилувчи органлари ҳамкорлигида қўлга олинди. 17 август куни карантин чекловлари бекор қилингач, Хуррам Б. қонуний чора кўрилиши учун Ўзбекистонга қайтарилди.

Маълум қилинишича, Хуррам Б. Жиноят кодексининг 135-моддаси 3-қисми «г» бандида (уюшган гуруҳ томонидан ёки унинг манфаатларини кўзлаб содир этилган одам савдоси) назарда тутилган жиноятни содир этганликда айбланмоқда. Унга қарши бошқа ҳеч қандай айблов кўзда тутилмаган.