Ўзбекистон Республикасига коронавирус инфекцияси кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссияси қарорига мувофиқ 2020 йил 15 августдан бошлаб Тошкент метрополитени фаолияти қайта йўлга қўйилади. Бу ҳақда Транспорт вазирлиги маълум қилди.

Фото: «Дарё»

Хабар берилишича, 15 август куни соат 06:00 дан бошлаб Тошкент метрополитенининг «Ўзбекистон», «Чилонзор» ва «Юнусобод» йўналишлари доимий иш режимида фаолият юритишни бошлайди.

Метро вагонлари доимий равишда қатновга чиқишдан олдин ва ҳар бир қатновни якунлагандан сўнг тўлиқ дезинфекциядан ўтказилади.

Санитария талаблари доирасида йўловчиларнинг метро бекатлари ва поезд вагонлари ичида тиббий ниқобда бўлиши талаб этилади, тиббий ниқобсиз йўловчилар метро бекатларига киритилмайди.

Янги касалланиш ҳолатларининг олдини олиш ва йўловчилар саломатлигини ҳимоя қилиш учун метрода ижтимоий масофани сақлаш ва ниқоб тақиш қатъий назорат қилинади.

Вазирлик хабарига кўра, Тошкент метрополитенининг «Юнусобод» йўналишининг янги қуриб битказилган бекатларида, шунингдек, ҳалқа метро йўналишининг Дўстлик—Қўйлиқ участкасида қатновлар ҳозирча амалга оширилмайди.

15 августдан бошлаб ниқоб тақмаган фуқаролар нафақат метрога, балки жамоат транспортининг бошқа турларига, шунингдек, бинолар ва муассасаларга ҳам киритилмайди.

Эслатиб ўтамиз, Республика махсус комиссиясининг 12 августдаги қарорида мамлакат ҳудудида 17 августдан жамоат транспорти фаолиятига рухсат бериш белгиланганди, бироқ метронинг ишга тушишига рухсат берилмаслиги қайд этилганди.