Artel компанияси Қозоғистондаги Sulpak билан ҳамкорлик қилишни бошлади

Дунёдаги оғир иқтисодий вазиятга қарамай, Artel компанияси мунтазам ривожланишда давом этмоқда ва чет эл бозорларига фаол кириб бормоқда. Artel корхонасининг янги ҳамкори - Қозоғистондаги Sulpak дўконлар тармоғи. Эндиликда Artel маиший техникасини ҳамёнбоп нархларда Қозоғистоннинг деярли ҳар қисмида харид қилиш мумкин.

Бугунги кунда Artel компанияси йирик маиший техника ишлаб чиқариш бўйича Марказий Осиёнинг етакчи корхоналаридан биридир. Корхона 20 турдан ортиқ маиший техника ишлаб чиқаради, маҳсулотлари эса нафақат ички бозорда, балки чет эл бозорларида ҳам юқори талабга эга ва истеъмолчилар томонидан ҳурматга сазовор бўлган. Бугунги кунда Artel маҳсулотлари Россия, Украина, Грузия, Молдова, Қирғизистон, Афғонистон, Тожикистон, Озарбайжон ҳамда Қозоғистон каби давлатларга экспорт қилинмоқда. 2019 йилда фақатгина Қозоғистонга 20 миллион АҚШ доллари миқдоридан ортиқ маҳсулот экспорт қилинган.

Эндиликда Artel маҳсулотлари Қозоғистонда энг йирик техника ва электроника дўконлар тармоғи ҳисобланувчи Sulpak дўконларида сотилмоқда. Sulpak 130 дан ортиқ дўконга эга бўлиб Қозоғистоннинг 38 шаҳрида, ҳамда Қирғизистоннинг 2 шаҳрида фаолият юритади. Компаниянинг йиллик даромади деярли 1 млрд АҚШ долларини ташкил этади, Қозоғистон бозоридаги улуши эса деярли 30% тенгдир.

Artel компанияси Sulpak билан 3 йил муддатга миқдори 30 млн АҚШ долларига тенг бўлган шартнома имзолади. Ушбу шартнома асосида 1 млн АҚШ долларидан ортиқ миқдордаги маиший техника сотувга тайёр. Йил давомида эса 8 миллион АҚШ доллари миқдорида маҳсулот сотилиши режалаштирилган. Ушбу шартнома бўйича ошхона плиталари, совутгичлар, кир ювиш машиналари ва электр сув иситгичлари каби маиший техника экспорт қилинмоқда. Юқорида кўрсатилган рақамлар Artel маиший техникаси Қозоғистонда қанчалик оммабоп ва юқори талабга эгалигини яққол намойиш этмоқда.

Маҳсулот сифатини мунтазам яхшилаб бориш ва ишлаб чиқариш жараёнида замонавий технологияларни тадбиқ этиш ўз мевасини бермоқда. Artel компанияси дадил ривожланмоқда ва янги бозорларни забт этишда давом этмоқда. Яқин орада компания яна икки давлат билан ҳамкорлик қилишни бошлайди. Бу қайси давлатлар эканини эса яқин кунларда билиб оласиз.

Реклама ҳуқуқи асосида.