Ёшга ёш қўшувчи 5­­-10 йилни олиб ташлаш ҳар кимнинг ҳам орзуси бўлса керак. Улар рўёбга чиқиши учун пардозга бир нечта оддий ўзгартиришлар киритилса бас!

Фото: Shutterstock

Пардозда рангдан фойдаланиш керак

Юзни пардозлашдан аввал унга бироз ранг бериш майда ажинларни беркитади, тери қатламини юмшатади ва унинг текис кўринишга олиб келади. Агар юз чизиғини ёки рангини ўзгартириш керак бўлса, бироз рангдоридан фойдаланган маъқул. Агар мақсад ажинларни беркитиш бўлса, бунинг учун тери рангдагисини ишлатиш керак.

Фото: Getty Images

Хайлайтерни қандай ишлатиш керак?

Агар хайлайтердан тўғри фойдаланилса, кўзнинг ташқи бурчаги визуал даражада кўтарилади. Албатта, бу ҳолат ёшни яширишга ёрдам беради. Ушбу воситани қошнинг пастки қисмида ички бурчакдан ташқи бурчакка қараб суртиш керак. Шунингдек, яноқ соҳаси ҳамда бурун қисмига ҳам хайлайтердан оро берилса, аёл жозибадорлиги янада ортади.

Фото: Getty Images

Қора тушми ёки кўк?

Эшитилганда ғалати туюлиши мумкин, аммо кўк киприклар оқ рангни янада тиниқлаштиради, кўзни порлоқ кўрсатади. Бу эса ёшликнинг энг муҳим белгисидир.

Фото: Getty Images

Тирноқнинг шакли ҳам муҳим 

Тирноқларни маникюр қилдирганда, уларга бодом шаклини берган афзал. Сабаби ушбу шакл қўлларни узунчоқ ҳам навқирон қилиб кўрсатади. Шунингдек, бўёқнинг ранги танага мос тушиши керак.

Турмак устида ишлаш керак

Агар сочлар текис бўлса, унда паст кесиш керак. Бу орқали пешонадаги ажинлар яширилади ва юзни бироз ёшартиради. Сочлар жингалак бўлса, каскад услубида кесиш керак. Сабаби бу турмак сочни янада қалин кўрсатади.

Фото: Getty Images

Сочга жило бериш керак

Ёшликнинг яна бир белгиси – сочларнинг жилоланиши. Агар табиий йўл билан бунга эришилмаса, қуруқ сочлар учун махсус мойлар мавжуд. Улар нафақат чирой беради, балки соғлик учун ҳам фойдалидир.