Хушбўй атирларига эга машҳур Dior француз компанияси эндиликда заргарлик буюмларининг янги тўпламини ишлаб чиқарди. Тақинчоқлар дизайни устида ишлаган Виктория де Kастеллан илҳомни на табиатдан ва на ҳашаматли бинолардан олди. Заргарлик буюмлари борасида йигирма йиллик тажрибага эга француз хоними оддийгина «тай-дай» – «матоларни бўяш» услубига мурожаат қилди.

Фото: Getty Images

Тie & Dior бу – олмос, сапфир, ёқут, зумрад ва бошқа қимматбаҳо тошлардан тайёрланган ранглар симфонияси. Камалакдек товланувчи тақинчоқлар нафақат турли хил ранглар, балки ҳар хил ўлчамдаги кесмалардан ташкил топган.

Фото: Getty Images

Компания ижодкорлари нодир тошларга ҳамоҳанг тарзда марваридлар билан ҳам ишлади. Жефф Кунснинг ижодида оқ ҳамда пушти ранг марваридлар узук, билагузук, тўғнағич ва бошқа заргарлик буюмларининг энг аҳамиятли қисмига айланди. Айниқса, марваридларнинг табиий ва нафис товланиши қимматбаҳо тошларнинг порлашини янада кучайтирди.

Фото: Getty Images

«Тай-дай» (инг.tie-dye) – «боғлаш-бўяш» маъносини англатади. Қадимги Ҳиндистон, Хитой ва Африкада пайдо бўлган ушбу услубда мато қатлаш ёки сиқиш орқали бўялади. Турли хил ноодатий нақшларни ҳосил қилган ранг-баранг либослар айни дамда ҳам урфга кирган.