Давлат хизматлари агентлиги ходими коронавирусдан вафот этди. Бу ҳақда агентликнинг расмий Telegram саҳифасида маълум қилинди.
Фото: Давлат хизматлари агентлиги
«Давлат хизматлари агентлиги жамоаси Давлат хизматлари агентлиги Навоий вилояти бошқармасининг масъул ходими Деҳқонов Адҳамжон Тожибоевичнинг вафоти муносабати билан марҳумнинг қариндош ва яқинларига чуқур таъзия изҳор этади», — дейилган хабарда.
Соғлиқни сақлаш вазирлиги бу хабарни ҳали расман тасдиқлаганича йўқ.
15 июль куни Ўзбекистон Ички ишлар вазирлиги матбуот хизмати 13 ва 14 июль кунлари тизимнинг икки нафар ходими вафоти этганини маълум қилган. Жумладан, 13 июль, душанба куни Тошкент шаҳар ИИББ Ахборот технологиялари, алоқа ва ахборотни ҳимоялаш бўлими бошлиғи ўринбосари, майор Аълохон Шомаҳмудовнинг вафот этгани, 14 июлда эса ИИВ Миграция ва фуқароликни расмийлаштириш бош бошқармаси бўлими бошлиғи подполковник Шавкат Нафасовнинг вафоти муносабати билан таъзия эълон қилганди. ССВ орадан қарийб бир сутка вақт ўтганидан кейин ушбу хабарни тасдиқлаб, 70 ҳамда 71-ўлим сифатида ўз статистикасига қўшганди.
