Дунёдаги энг қиммат нархдаги аёллар оёқ кийимлари

Ушбу туфлиларнинг кўринишига қараб кишининг ҳаваси келса, нархини билиб «капалаги учиб кетиши» аниқ.

1. Нархи 500 минг долларни ташкил қиладиган мазкур туфли, «Бриллиант орзу» деб аталиши бежиз эмас. 1420 та бриллиант билан безалган пойабзалдаги тошлари 30 каратни ташкил қилади. Дизайнер Стюарт Вайцманнинг ижод намунаси бўлган мазкур модель, 2007 йилда ўтказилган Оскар тақдирлаш маросимида Аника Нони Роуз томонидан кийилган.

2. Иккинчи қимматбаҳо оёқ кийимнинг муаллифи ҳам Стюарт Вайцман ҳисобланади. Фақат мазкур модель, бриллиант билан эмас, 642 дона бирма ёқутлари билан безалган. Босоножка нархи 1,6 миллион долларга баҳоланган.

3. Учинчи гўзаллик намунаси дизайнер Стюарт Вайцман томонидан тақдим қилинган бўлиб, босоножка безаги бўйинга тақиладиган тақинчоқни эсга солади. Олмос ва танзилит тошлари билан безатилган пойабзал нархи 2 миллион долларни ташкил қилади.

4. Юқоридаги моделлар билан солиштирилганда унчалик эмасдек туюладиган пойабзал юзаси платина билан қопланган ҳамда 565 дона бриллиант билан безатилган. Бу оёқ кийимнинг нархи ҳам 2 миллион долларни ташкил қилади.

5. Чармдан ишланган ушбу туфли тилла билан қопланиб, 236 дона бриллиант билан безатилган. Пойабзал нархи 17 миллион доллар этиб белгиланган.