Британия маликаси Диананинг қора бахмал кўйлаги, пандемия вақтида изоляция хонасида сақланмоқда. Бу ҳақда Harper’s Bazaar нашри хабар берди.
Диана мазкур кўйлакда 1985 йил Оқ уйда уюштирилган зиёфатда кўриниш берган ҳамда Жон Траволта билан бирга рақсга тушганди. Таъкидланишича, кўйлак Британиялик Виктор Эдельштейн томонидан яратилган бўлиб, дизайнер машҳур Оскар де ла Рентага тенглаштирилган.
Диананинг қора бахмал кўйлаги, 2019 йилнинг декабрь ойида аукционга сотиш учун қўйилган. Бошланғич нархи 220 минг фунт стерлинг (2 828 363 359 сўм) ташкил қилган либос, пул тикилмагани сабаб сотилмаган.
Қироллик либослари коллекцияси куратори Элери Линнинг сўзларига қараганда, либос айни вақтда «изоляция хонаси»да сақланмоқда. Коллекциядаги барча либослар куя тушиши ҳамда либос сифати бузилишини олдини олиш мақсадида, вақти-вақти билан музлатиш ёки термик усул билан ишлов берилади, дейилади хабарда.
«Кўйлак аввалроқ музлатилган кейин ҳеч қандай ёриқлар йўқлигига амин бўлиш учун бир неча ҳафтага муздан эритиш учун қолдирилган», — дейди Элери.
Қўшимча қилинишича, юқоридаги босқичлардан кейин либосни одатдаги сақлаш учун тайёрлаш керак бўлган, аммо пандемия туфайли бу жараён тугалланмай қолган. Натижада Диананинг мазкур либоси, коллекциядаги бошқа намуналардан алоҳида, карантинда сақланмоқда.
Изоҳ (0)