Хитой ҳукумати коронавирусга қарши вакцина ишлаб чиқилиб, синовдан ўтказилгач уни бутун дунёга тарқатиш ниятида. Бу ҳақда Хитой илм-фан ва техника вазири Ван Чжиганга таяниб, «Жэньминь Жибао» газетаси хабар берди.
Фото: Global Look Press
«Кейинги босқичда — Хитой вакцинаси яратилиб, клиник синовлардан ўтказилиб, фойдаланишга тайёр бўлганида — мамлакат раиси Си Цзиньпин томонидан Жаҳон соғлиқни сақлаш ассамблеясининг 73-сессиясида эълон қилган мажбуриятимизни бажарамиз ва ундан бутун дунё фойдаланиши мумкин бўлади», — дейди Ван Чжиган.
Унинг сўзларига кўра, Хитойдаги олимлар камида беш турдаги вакцина устида иш олиб бормоқда. Уларнинг айримларини синовдан ўтказиш бошланган. Вазирнинг таъкидлашича, вакциналарни яратишда, асосан, унинг хавфсизлиги, самарадорлиги ва ҳаммабоплигига эътибор қаратилмоқда.
Аввалроқ Россия бош вазири COVID-19’ни даволашда давлат рўйхатидан ўтказилмаган Хитой препаратидан фойдаланишга рухсат бергани хабар берилган эди. Ўзбекистонда ҳам коронавирусни даволашда фойдаланилаётган препарат номи маълум қилинган.
Мавзуга доир:
Эслатиб ўтамиз, май ойининг бошларида Япония ҳукумати коронавирусга чалинган беморларни даволашда Американинг вирусга қарши тажрибавий «Ремдесивир» препаратидан фойдаланишни маъқуллаган эди.
