Германия ташқи сиёсатда ўз стратегиясини қайта кўриб чиқмоқда ва кўплаб шерик-давлатлар билан ҳамкорликдаги лойиҳаларни тўхтатмоқда, деб хабар бермоқда Deutsche Welle.
Фото: Президент матбуот хизмати
Унга кўра, Иқтисодий ҳамкорлик ва тараққиёт федерал вазирлиги (BMZ) Германия кўмаклашиб келган ҳамкор-давлатлар сонини 85 тадан 60 тага қисқартиради.
Идора раҳбари Герд Мюллернинг айтишича, вазирлик томонидан рўйхатдан ўчирилган айрим давлатлар «шу даражада тараққий этганки, эндиликда кўмакка муҳтож эмас». Бошқа давлатларда эса Германиянинг ёрдами «бошқа давлатлар фонида» шунчаки кўринмай қолмоқда.
Вазирлик берган изоҳга кўра, ҳамкорликнинг қисқартирилиши Германиянинг бу мамлакатлар билан «бундан буён ҳамкор-давлат эмаслиги»ни англатмайди, бу фақатгина «ҳамкорлик шаклининг ўзгариши» холос. Ушбу давлатлар билан мулоқот давом эттирилади, йўлга қўйилган лойиҳалар эса, албатта, якунига етказилади.
Хусусан, Марказий Осиёда Германия фақатгина Ўзбекистон билан ҳамкорликни давом эттиради. Туркманистон ва Қозоғистон билан ҳамкорлик тўлиқ тўхтатилмоқда, Тожикистон ва Қирғизистон билан фаолият эса мавжуд битимлар бўйичагина давом эттирилади.
Германия молия вазирлигининг ушбу қарори немис депутатларининг танқидига учраган. Бундестагнинг «Германия—Марказий Осиё» парламент гуруҳи раҳбари, депутат Манфред Грунд ушбу қарор бўйича ўзининг ҳайратини яширмаган ва минтақадаги кўпгина масалаларни фақатгина Ўзбекистон билан ҳал этиш мумкин эмаслигини, Марказий Осиёнинг бошқа давлатлари иштироки ҳам муҳимлигини айтган.
Грунд фикрича, Германия ўзининг бу кетиши билан «молиявий ва технологик туйнукларни қолдирмоқда ва уларнинг ўрнини бошқалар, мисол учун, Хитой эгаллаши мумкин». Грунд Марказий Осиё давлатларини шериклар рўйхатидан чиқариб ташлаганини «зудлик билан тузатилиши лозим бўлган жиддий минтақавий-сиёсий хато» деб ҳисобламоқда.
