Germaniya tashqi siyosatda o‘z strategiyasini qayta ko‘rib chiqmoqda va ko‘plab sherik-davlatlar bilan hamkorlikdagi loyihalarni to‘xtatmoqda, deb xabar bermoqda Deutsche Welle.
Unga ko‘ra, Iqtisodiy hamkorlik va taraqqiyot federal vazirligi (BMZ) Germaniya ko‘maklashib kelgan hamkor-davlatlar sonini 85 tadan 60 taga qisqartiradi.
Idora rahbari Gerd Myullerning aytishicha, vazirlik tomonidan ro‘yxatdan o‘chirilgan ayrim davlatlar “shu darajada taraqqiy etganki, endilikda ko‘makka muhtoj emas”. Boshqa davlatlarda esa Germaniyaning yordami “boshqa davlatlar fonida” shunchaki ko‘rinmay qolmoqda.
Vazirlik bergan izohga ko‘ra, hamkorlikning qisqartirilishi Germaniyaning bu mamlakatlar bilan “bundan buyon hamkor-davlat emasligi”ni anglatmaydi, bu faqatgina “hamkorlik shaklining o‘zgarishi” xolos. Ushbu davlatlar bilan muloqot davom ettiriladi, yo‘lga qo‘yilgan loyihalar esa, albatta, yakuniga yetkaziladi.
Xususan, Markaziy Osiyoda Germaniya faqatgina O‘zbekiston bilan hamkorlikni davom ettiradi. Turkmaniston va Qozog‘iston bilan hamkorlik to‘liq to‘xtatilmoqda, Tojikiston va Qirg‘iziston bilan faoliyat esa mavjud bitimlar bo‘yichagina davom ettiriladi.
Germaniya moliya vazirligining ushbu qarori nemis deputatlarining tanqidiga uchragan. Bundestagning “Germaniya—Markaziy Osiyo” parlament guruhi rahbari, deputat Manfred Grund ushbu qaror bo‘yicha o‘zining hayratini yashirmagan va mintaqadagi ko‘pgina masalalarni faqatgina O‘zbekiston bilan hal etish mumkin emasligini, Markaziy Osiyoning boshqa davlatlari ishtiroki ham muhimligini aytgan.
Grund fikricha, Germaniya o‘zining bu ketishi bilan “moliyaviy va texnologik tuynuklarni qoldirmoqda va ularning o‘rnini boshqalar, misol uchun, Xitoy egallashi mumkin”. Grund Markaziy Osiyo davlatlarini sheriklar ro‘yxatidan chiqarib tashlaganini “zudlik bilan tuzatilishi lozim bo‘lgan jiddiy mintaqaviy-siyosiy xato” deb hisoblamoqda.
Izoh (0)