Бухорода 10 йилда 8 маротаба жиноий жавобгарликка тортилган аёлга суд ҳукми ўқилди

Бухорода ўн йилда саккиз маротаба жиноий жавобгарликка тортилган 26 ёшли хавфли рецидивист аёл Н.С. ўзганинг мол-мулкини ўғирлашда айбланиб, тўрт йилга озодликдан чеклаш билан жазоланди. Бу ҳақда «Дарё»га Жиноят ишлари бўйича Қоровулбозор туман суди раиси Маҳмуд Орипов маълум қилди.

Маълумот берилишича, 26 ёшдаги бу аёл 2010 йилдан ҳозирга қадар саккиз маротаба жиноий жавобгарликка тортилган.

Наманган вилоятининг Чортоқ туманида туғилган Н.С. уч фарзанднинг онаси бўлишига қарамасдан қинғир иш қилишда давом этиб, Ғиждувон тумани марказидаги тилла тақинчоқлар савдо дўконидан 6 миллион сўмлик аёллар тилла занжирини ўғирлаб чиқади. Орадан кўп ўтмай, савдо дўкони эгаси Дилноза Ражабова бир дона занжири ўғирланганини билиб, ИИБга мурожаат қилган.

ИИБ ходимлари томонидан олиб борилган тезкор қидирув ишлари натижасида ўғрилик содир этган аёл Навоий вилоятига бориш учун Қизилтепа туманидан ўтиб, Кармана туманидаги Дўрмон қишлоғига етган вақтида автомобилдан тушиб қочишга уринганда қўлга олинган.

Н.С. ўз жиноятини тан олган. Ундан тергов давомида 2 миллион 600 минг, суд жараёнида эса 3 миллион 400 минг сўм моддий зарар ундирилган.

Жиноят кодексининг 169-моддаси (Ўғрилик) 3-қисми «а» банди билан айбдор деб топилган Н.С.нинг ишини кўриб чиққан суд унинг олти ойлик фарзанди борлигини, шунингдек, айбига иқрорлиги ва жабрланувчига етказилган зарарни тўлиқ қоплаганлигини инобатга олиб, унга тўрт йилга озодликни чеклаш жазосини тайинлаган.