Ижтимоий тармоқларда давлат коронавирусга чалинган беморлар учун харажатлар жаримага қўйилган автомобиллардан ундириладиган жарималар ҳисобидан қопланаётгани ҳақидаги гап-сўзлар тарқалди. Санитария-эпидемиология назорати давлат инспекцияси бошлиғи Нурмат Отабеков 25 май куни ўтказилган брифингда бундай фикрларга муносабат билдирди.
«Бир нарсани аниқ билиш керак: давлат бу жарималардан тушадиган маблағларга муҳтож эмас. Жарималарни қўллашдан асосий мақсад — бу каби қонун бузилиш ҳолатларига йўл қўйилишининг олдини олиш. Одамларнинг моддий нуқтаи назардан масъулиятини ошириш бўляпти. Шундай экан, бу ерда масаланинг иккинчи томони турибди.
Дейлик, жарима майдонида машинаси турган ҳайдовчининг давлат қонунини бузишга нима ҳақи бор эди? У нима учун давлат қонунини писанд қилмади? Сиз билан бизнинг саломатлигимизни хавф остига қўйишга унинг ҳақи бормиди? Мана шу саволларни ҳам ўйлаб қўйишимиз керак бўлади», — деди Нурмат Отабеков.
Ҳозирда 45 455 киши карантинда ва уларнинг ҳар бири учун 2,2 миллион сўмдан ажратилган, бу жами 100 миллиард сўмдан ортиқ маблағни ташкил этади.
«Бу каби катта маблағларни жаримадан ундириб, шунинг ҳисобидан қоплаш мумкинми? Буларнинг ҳаммаси давлат ҳисобидан кетаётган харажатлардир. Демак, бундан кўриниб турибдики, давлат сизнинг маблағингизга муҳтож эмас. Энг асосийси — қонунни бузишга ва бошқаларнинг саломатлигини хавф остига қўйишга ҳақингиз йўқ. Қонунга нисбатан беписанд муносабатда бўлдингизми, шунга яраша жавобини беришингиз керак бўлади», — деган Нурмат Отабеков.
Аввалроқ Ўзбекистонда COVID-19 беморлари ва карантинга олинганлар учун 200 миллиард сўмдан ортиқ маблағ сарфлангани хабар берилганди.
Изоҳ (0)