Намангандан табиий офатдан жабр кўрган Бухоро вилояти ва сув омбори тошиши туфайли аҳолиси эвакуация қилинган Сирдарё вилоятига 11 та юк автомашинасидан иборат кўмак карвони юборилди. Бу ҳақда «Дарё» мухбири Азизбек Абдувалиев хабар бермоқда.

Фото: Ҳамдам Мамадалиев

Хайрия карвони бошпанасиз қолган сирдарёликларга умумий қиймати 1,7 миллиард сўмлик озиқ-овқат ва қишлоқ хўжалиги маҳсулотлари, кийим-кечак ва кўрпа-ёстиқ олиб кетган бўлса, Бухорога 450 миллион сўмлик қурилиш материаллари жўнатилди.

Фото: Ҳамдам Мамадалиев

Мазкур карвоннинг шаклланишига Наманган шаҳри тадбиркорлари катта ҳисса қўшди. Жумладан, Сирдарёга Aisha Home Textile корхонаси 250 миллион сўмлик, «Наманган порлоқ таъмирлаш сервис» МЧЖ 160 миллион сўмлик, Бухорога эса «Мехмаш» МЧЖ томонидан 125 миллион сўмлик ўзларида ишлаб чиқарилган маҳсулотлар ажратилди.

Фото: Қодирхон Бобомирзаев

Намангандан жўнаган кўмак карвонини вилоят ҳокими Хайрулло Бозоров бошчилигидаги мутасаддилар кузатиб қўйди.

Фото: Ҳамдам Мамадалиев

Ёшлар Иттифоқи Наманган вилоят кенгаши ва вилоят «Ёшлар-келажагимиз» жамғармаси томонидан ҳам Сирдарё вилоятининг Сардоба туманига «Саховат карвони»ни юборишга ҳозирлик кўрилмоқда.

Фото: Ёшлар Иттифоқи Наманган вилоят кенгаши

7 май куни йўлга чиқиши режалаштирилган карвондан наманганлик ёш тадбиркорлар томонидан ишлаб чиқарилган трикотаж маҳсулотлари ва қурилиш моллари жой олади.

«Дарё» мухбири Умиджон Мамарасуловнинг хабар беришича, 3 май куни сирдарёликлар учун Андижон вилоятидаги шаҳар ва туман ҳокимликлари ташаббуси билан жами 4 миллиард сўмлик навбатдаги инсонпарварлик кўмаги юборилган.

Фото: Шерзод Сотволдиев

17 та юк машинасига ортилган кўмак карвонида озиқ-овқат ва ноозиқ-овқат маҳсулотлари, кийим-кечаклар, санитар-гигиеник ҳамда тиббий воситалар, бирламчи эҳтиёж учун зарур бўлган анжомлар мавжуд. Карвонга Андижон вилояти ҳокими Шуҳратбек Абдураҳмонов, уламолар ва нуронийлар оқ йўл тилади.

Фото: Шерзод Сотволдиев

«Дарё» мухбири Азиз Эрматовга кўра, 3 май куни Фарғонадан Сирдарё вилоятига 250 тонна цемент, 4800 дона шифер, 120 мингта пишган ғишт, 3000 квадрат метр қурилиш ойнаси ва 400 кубометр ювилган қум ортилган 47 та юк машинаси, қурилиш ва ирригация техникаларидан иборат махсус ёрдам гуруҳи юборилган.

Фото: Азиз Эрматов

Шу куни сардобаликлар учун зарур озиқ-овқат маҳсулотлари ва кийим-кечак ортилган 30 та юк машинасидан иборат навбатдаги кўмак карвони ҳам йўлга чиққан.

Фото: Азиз Эрматов

Қайд этилишича, икки кун давомида Фарғонадан Сирдарёга 1 миллиард 59 миллион сўмлик хайрия ёрдами юборилган.