Бугун,

  • USD 11095.31
  • RUB 173.84
  • EUR 10772.44

Коронавирус пандемияси сабаб дунё бўйлаб деярли барча спорт мусобақалари тўхтатилди. Шу жумладан, футбол бўйича мусобақалар ҳам. «Дарё» мухлисларнинг талаб ва таклифларини инобатга олган ҳолда турли мусобақаларда урилган энг сара голларни тақдим этиб боради. Ушбу лойиҳанинг навбатдаги сонида Жанубий Африка Республикаси  майдонларида ўтган 2010 йилги Жаҳон Чемпионатида киритилган энг чиройли голлар тақдим этилади. Голлар рейтинги ФИФА талқинига кўра тузиб чиқилган.

Фото: Getty Images

Фото: Getty Images

10-ўрин. Габриэль Ҳайнце, гуруҳ босқичи | Аргентина—Нигерия 1:0

Аргентиналиклар жамоа қариялари Хуан Себастьян Верон ва Габриэль Ҳайнценинг ҳаракатидан кейин ҳисобни очади. Бу гол муросасиз кечган ўйин тақдирини ҳал қилиб беради. Мазкур ўйин билан Аргентина—Нигерия жуфтлигининг Жаҳон Чемпионатларидаги мунтазам тўқнашуви бошланади. 2010 йилдан буён ҳар бир ЖЧ гуруҳ босқичида бу икки жамоа ўзаро тўқнаш келаверади ва уларда чиройли голлар бўлаверади.

9-ўрин. Салли Мунтари, 1/4 финал | Уругвай—Гана 1:1 (П—4:2)

Ярим финал йўлланмаси учун кечган ўйинда Мунтари биринчи бўлимга қўшиб берилган вақтда ажойиб голга муаллиф бўлади. Бироқ иккинчи бўлимда ҳисоб тенглашади ва қўшимча бўлимлар сўнггида нималар бўлганини футбол мухлислари жуда яхши билади: Луис Суарес ўзини «қурбон» қилган ҳолда жамоасини кейинги босқичга олиб чиққанди.

8-ўрин. Лукаш Подольски, 1/8 финал | Германия—Англия 4:1

Англиянинг бир қарашда осон туюлган гуруҳдан иккинчи ўринда чиқиши натижасида бу икки номдор рақиб 1/8 финалдаёқ ўзаро тўқнаш келиб қолади. «Немис машинаси» қитъадошига ҳеч қандай имкон қолдирмаган ҳолда йирик ҳисобда ғалаба қозонади, Подольски эса жамоасининг иккинчи голини мана шундай усулда киритади.

7-ўрин. Фабио Квальярелла, гуруҳ босқичи | Словакия—Италия 3:2

Амалдаги Жаҳон Чемпионлари мусобақани жуда омадсиз ўтказади. Дастлабки икки турда Парагвай ва Янги Зеландия билан дуранг ўйнаб қўйган апеннинликлар кейинги босқичга чиқиш учун камида дуранг ўйнаши зарур эди. Бироқ Квальярелла сўнгги дақиқалардаги ушбу шедевр голи ҳам италянларни мағлубиятдан қутқариб қололмайди.

6-ўрин. Сипиве Тшабалала, гуруҳ босқичи | ЖАР—Мексика 1:1

Равшан Эрматовнинг ҳуштагидан сўнг ЖЧ—2010 мусобақасини очиб берган ўйин. Мезбонлар етакчиси Тшабалала мусобақанинг илк голини мана шундай чиройли тарзда киритади.

5-ўрин. Луис Суарес, 1/8 финал | Уругвай—Жанубий Корея 2:1

Учрашувда мувозанат сақланиб турган бир вақтда Луис Суарес 80-дақиқада ажойиб зарбаси билан дубль қайд этган ҳолда жамоасининг ғалаба тўпини киритади.

4-ўрин. Карлос Тевес, 1/8 финал | Аргентина—Мексика 3:1

Майдон марказида тўпни қабул қилиб олган Тевес узоқ масофадан аниқ зарба йўллаган ҳолда ҳисобни йирик кўринишга олиб келди. Мексикаликлар илк ўйинда бўлгани каби мазкур мусобақадаги сўнгги ўйинида ҳам чиройли гол ўтказиб юборади.

3-ўрин. Месут Ўзил, гуруҳ босқичи | Гана—Германия 0:1

Германия учинчи турга қадар бир мағлубият ва бир ғалаба қайд этган ҳолда етиб келган, кейинги босқичга йўл олиш учун ушбу баҳсда очко ишлаши шарт эди. Месут Ўзилнинг ягона голи немисларга ғалаба билан бирга гуруҳ пешқадамлигини тақдим этади.

2-ўрин. Жованни ван Бронхорст, 1/2 финал | Уругвай—Нидерландия 2:3

Финал остонасидаги баҳсда ван Бронхорст ўзининг ақл бовар қилмас зарбаси билан ҳисобни очганди. Умуман олганда мазкур мусобақада тўпнинг кутилмаган траектория туфайли дарвозадан олиши жуда кўп кузатилган. Бунга «дарвозабонлар душмани» деб ном олган мусобақанинг расмий тўпи «Жабулани» сабаб қилиб кўрсатилади. ЖЧ—2010 учун махсус чиқарилган ушбу тўпни кўпчилик дарвозабон ва мураббийлар танқид остига олганди.

1-ўрин. Диего Форлан, 3-ўрин учун баҳс | Уругвай—Германия 2:3

Кучли ўнликни яна Уругвай иштирокидаги ўйинда киритилган гол якунлаб беради. Мусобақанинг брозна медаллари учун кечган ўйинда Диего Форлан тўпга айёррона зарба берган ҳолда немислар посбонини томошабинга айлантирганди.

Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!

Изоҳ
Асосий янгиликлар
Маҳаллий
Ўзбекистонда 2 декабрь куни 156 кишида коронавирус аниқланди
Маҳаллий
Жанубий Корея мамлакатда ишлаш ниятидаги ўзбекистонликлар учун квоталар сонини оширади
Дунё
«Ҳинд Чернобили» — Пхобалдаги техноген ҳалокат, Эрон олий раҳбарига айланган Ҳоманаий ва Совуқ урушга якун ясаган Ельцин—Буш. Кун хронологиясида 3 декабрь