АҚШда COVID-19 коронавирус инфекцияси билан касалланганлар сони 700 минг кишидан ошиб кетди. Бу ҳақда касаллик тарқалишини реал вақтда кузатиб бораётган Жонс Ҳопкинс университети маълумотларида келтирилган.
Тошкент вақти билан соат 10:20 ҳолатига кўра, АҚШда 702 164 кишида коронавирус аниқланган. 37 054 киши инфекция оқибатида вафот этган бўлса, 58 мингдан ортиқ бемор даволанишга муваффақ бўлган.
Маълумотларга кўра, энг оғир вазиятни Нью-Йорк шаҳри бошидан кечирмоқда, шаҳарда 13 мингдан ортиқ одам коронавирус қурбонига айланган. Нассо округида эса 1109 киши коронавирусдан вафот этган бўлса, Уэйн округида (Мичиган) уларнинг сони 1044 кишига етди.
Бутун дунё бўйлаб коронавирусга чалинганлар сони 2,2 миллион кишидан, қурбонлар сони эса 154 минг кишидан ошиб кетди. Касаллар сони бўйича АҚШдан кейинги ўринда Испания кетмоқда — 190,8 минг бемор (20 минг одам вафот этган). Учинчи ўринни эса 172 минг касал ва 22 минг қурбон билан Италия эгаллаган.
АҚШ президенти Дональд Трампнинг сўзларига кўра, мамлакатда коронавирус қурбонлари сони 60-65 минг кишини ташкил этиши мумкин. Аввалроқ Трамп АҚШда коронавирус сабаб жорий этилган чекловларни босқичма-босқич бекор қилиш режаси билан бўлишган эди.
Мавзуга доир: Дональд Трамп Жаҳон соғлиқни сақлаш ташкилотини молиялаштиришни тўхтатишини маълум қилди
Изоҳ (0)