Бразилия Хитойдан 240 млн дона тиббий ниқоб сотиб олди

Бразилия ҳукумати коронавирусга қарши кураш йўлида Хитойдан 40 та рейс ёрдамида 240 миллион дона ҳимоя ниқобларини олиб келиш бўйича кенг кўламли операцияга тайёрланмоқда. Бу ҳақда мамлакат Инфратузилма вазирлигига таяниб, «РИА Новости» хабар берди.

Баёнотга кўра, бундан мақсад «Хитойдан Соғлиқни сақлаш вазирлиги томонидан харид қилинган 240 миллион дона ҳимоя ниқобини Бразилияга олиб келиш». Оғирлиги 960 тонна бўлган юк Гуанчжоу шаҳридан юборилиши керак.

Тахминларга кўра, юк Бразилияга 15 кундан сўнг етиб боради ва бунинг учун 40 та рейс керак бўлади. Уларга учиш-қўниш вақтида давлат аҳамиятига молик вазифани бажарувчи мақоми берилади.

Бразилия ҳукумати керак бўладиган ҳаво тармоғи устида бош қотирмоқда, шунингдек, тижорий юк ташувчи кемалардан, ҳарбий-ҳаво кучларига тегишли самолётлардан, расмий давлат транспорт воситалари ва ҳукуматга логистика таклиф қиладиган йирик импорт қилувчи компаниялардан фойдаланишни ҳам кўриб чиқяпти.

Бундан ташқари, Инфратузилма вазирлиги 540 тонна экспресс-тестлар, қўлқоплар, фартуклар, кўзойнак ва ниқобларни етказиб бериш учун Хитойдаги Vale тоғ-кон компанияси билан тузилган шартнома бўйича 11 юк рейсини амалга оширишда ёрдам бермоқда.

Сўнгги маълумотларга кўра, Бразилияда коронавирус билан касалланганлар сони 15 927 кишига етган, 800 киши вафот этган.

Аввалроқ Бразилия сенати раисида коронавирус аниқлангани ҳақида хабар берилганди. Бразилия президенти эса икки маротаба коронавирусга тест топширган ва унда касаллик аниқланмаган.