Apple компанияси тиббиёт ходимлари учун ҳафтасига миллион дона ҳимоя ниқобини ишлаб чиқаради. Бу ҳақда компания бош директори Тим Кук ўзининг Twitter’даги саҳифасида маълум қилди.

Фото: Twitter/@tim_cook

Apple’нинг ҳимоя ниқоблари iShield деб номланади. Компания биринчи партияни Санта-Клара водийсидаги (Калифорния) Кайзер шифохонасига етказиб берди. Шаффоф пластик ва бош тасмасидан иборат ниқоблардан COVID-19 билан касалланган беморларни даволовчи тиббиёт ходимлари индивидуал ҳимоя воситаси сифатида фойдаланади.

Apple раҳбари ниқоблар ишлаб чиқариш ташаббусини «дизайнерлар, муҳандислар, операторлар, қадоқловчилар ва етказиб берувчиларнинг биргаликдаги ҳаракатлари» деб атаган. Кукнинг таъкидлашича, ҳар бир ҳимоя воситасини йиғишга икки дақиқадан камроқ вақт сарфланади.

Apple биринчи навбатда Америка шифохоналарини ҳимоя воситалари билан таъминлаш ниятида, шундан сўнг уларни бошқа давлатларга юборади. Аввалроқ компания тиббиёт ходимларига 20 миллиондан ортиқ ниқобларни етказиб берган эди.