Ранглар киши кайфиятига таъсир қилиши исботланган факт. Ҳар бир рангнинг психологияси бўлади ва сиз кийган либос ранги қайсидир маънода сизнинг қандай инсонлигингиз, феъл атворингиз ёки ҳеч бўлмаганда кайфиятингиз қандай эканини билдиради. Карантин карантин билан аммо баҳорда ранглартерапиясини ҳеч ким инкор қилмайди. Шундан келиб чиққан ҳолда, эътиборингизга ранг-баранг либослар билан ўзингиз ва атрофдагиларга хуш кайфият, позитив бахш этишни тавсия қиламиз.

Фото: Google Images

Трендда бўлиш ёки ранглар орқали кайфиятни кўтариш учун бошдан-оёқ бир рангда кийиниш шарт эмас, шунчаки ёрқин рангли детални қўшишнинг ўзи етарли. Вақтинчалик савдо марказларига боришдан чекланиш ва онлайн шоппинг қилишни тавсия берган ҳолда рўйхатимизни бошлаймиз.

Кўк

Фото: Google Images

Кўк ранг – мазкур йилнинг асосий рангларидан бири бўлибгина қолмай, асабларни тинчлантирувчи экани билан ҳам аҳамиятли. Кўк палитра хотиржамлик ва осойишталикни англатади. Шундай экан, ўзингизда қандайдир безовталикни пайқасангиз ёки асабларингиз кундалик ташвишлардан таранг бўлса, кўк рангдаги либосларни, ҳеч бўлмаганда ушбу рангдаги аксессуарлар ­– сумка, камар, шарф ёки пойабзал кийишга ҳаракат қилинг.

Оловранг

Фото: Google Images

Баҳор ёмғирли бўладими ёки иссиқ, ушбу фасл келиши билан киши ич-ичидан янгилик ва ўзгариш исташи унинг ташқи танловида ҳам акс этиб, тўқ, бўғиқ ранглардан қочиб ёрқин, ранг-баранг либослар кийишни хоҳлайди. Жўшқинлик ва мамнуният ранги сифатида маълум бўлган оловранг эса, ҳатто булутли кунларда ҳам одамларни тетиклаштириш хусусияти борлиги билан нафақат баҳор, балки ёз-у қишда ҳам яхши танлов ҳисобланади.

Яшил

Фото: Google Images

Ушбу рангни ҳеч иккиланмай 2020 йилнинг энг машҳур ранги деб атаса бўлади. Яшил рангни нафақат кундалик балки, оқшом либоси сифатида ҳам танлашингиз мумкин. Уни исталган ранг билан мосласа бўлади. Масалан, яшил палто ёки тренч билан сариқ, қизил, оқ футболка ёки кроссовка кийсангиз кайфиятингиз кўтарилиши билан бирга, дид ва танловдан қўрқмаслигингизни исботлаган бўласиз.

Пушти+ қизил

Фото: Google Images

Қизил ва пушти ранг биргаликда ҳамиша мос бўлибгина қолмай, байрамона кайфият улашувчи хусусиятга эга. Ишонч ва қатиъятни англатувчи қизил билан нафосатни билдирувчи оч пушти дуэти кунлик кайфият позитив бўлиши ва эътибор марказида бўлишнинг гарови.

Сариқ

Фото: Google Images

Сариқ ранг шубҳасиз оптимизмни билдиради. Бироқ ушбу рангни танлаганда меъёридан ошириб юбормасликни унутмаслик керак. Рангнинг хусусиятидан келиб чиқиб шуни айтиш мумкинки, ҳар бир инсоннинг гардеробида йўқ деганда битта бўлса ҳам сариқ плаш, туфли ёки шарф бўлиши керак. Депрессия, стресс ва ташвишли вазиятларда кийимингизга сариқ рангли аксессуар қўшишни унутманг.