Коронавирус пандемияси дунёдаги кўплаб соҳалар хусусан, мода оламига ҳам ўз таъсирини ўтказмай қолмади. Люкс тоифадаги маҳсулотларнинг энг асосий истеъмолчиларидан бири — Хитой вируснинг ўчоғи бўлса, мода оламида энг нуфузли ва аҳамиятли бўлган Италия коронавирус билан касалланган давлатлар орасида иккинчи бўлиб турибди. Бу эса ўз навбатида соҳанинг оқсоқланишига сабаб бўлмоқда, бироқ таниқли бренд ва компания эгалари иқтисодий зарар ҳақида ўйлаб ҳам ўтирмай аксинча, вирусга қарши курашга моддий ёрдам бермоқда, деб ёзмоқда «Elle.ru».
Дизайнер Жоржио Армани пандемияга энг биринчилардан бўлиб реакция билдирган, ҳали халқ орасида ваҳима бошланмасиданоқ бренд тақдимотини профилактика мақсадида ёпиқ жойда ўтказишга қарор қилган. Шунингдек, ҳали Италияда карантин эълон қилинишидан аввал огоҳлик ва ишчиларининг соғлиғига хавф солмаслик учун барча ўзига қарашли бўлган ресторан, меҳмонхона ва дўконларни вақтинчалик ёпилишини маълум қилган. Бундан ташқари, ҳафта бошида Armani Италиядаги шифохоналарга жами 1,25 миллион евро хайрия қилди.
Versace бренди вирус ҳақидаги хабарларни жиддий қабул қилиб олдиндан эҳтиёт чораларини кўрган яна бир йирик компания ҳисобланади. Аввалига Донателла Версаче 16 майда АҚШда бўлиб ўтиши керак бўлган кўргазмани бекор қилишини билдирган бўлса, кейинчалик Хитой Қизил Хоч жамиятининг тиббий эҳтиёжлари учун 143 минг доллар, Италиядаги тиббиёт муассасалари учун жами 200 минг евро сарфлади ҳамда коронавирус билан касалланганлар ва уларнинг оила аъзоларига улар билан эканини таъкидлади.
Бошқа брендлар ҳам бу борада жим қараб тургани йўқ. Bvlgari соат бренди Римда жойлашган Lazzaro Spallanzani шифохонасининг тадқиқот бўлимига моддий ёрдам берган ва бу ташаббус COVID-19 га қарши вакцинани ишлаб чиқишда муҳим рол ўйнаган.
Dolce & Gabbana бренди эса Instagram саҳифасида Италиядаги Humanитас университетининг иммун тизимининг коронавирусга реакциясини ўрганиш ва ташхис қўйиш борасида тадқиқотлар ўтказиш учун моддий қўллаб-қувватлаганини маълум қилган.
H&M Foundation АҚШдаги фондга 500 минг доллар миқдорида пул ажратган.
Louis Vuitton, Dior, Givenchy, Kenzo, Loewе, Marc Jacobs ва бошқа брендларга эгалик қилувчи LVMH компанияси Хитойдаги Қизил Хоч жамияти учун жами 2,2 миллион доллар хайрия қилган.
Cartier, Van Cleef & Arpels ва Chloe’ларга эгалик қилувчи Richemont Group COVID-19 га қарши курашиш учун 1,4 миллион доллар сарфлаган.
Gucci, Bottega Veneta, Saint Laurent, Balenciaga, Alexander McQueen брендларига эгалик қилувчи Kering компанияси ҳам Хубэйдаги Қизил Хоч шифохонасига жами 1 миллион доллар ёрдам пули ажратган.
South China Morning Post нашрининг маълум қилишича, Hermès бренди вирусга қарши курашувчи тиббиёт ходимларини моддий таъминловчи China Soong China Ling Foundation ҳисобига 5 миллион юань (711 278 доллар) ўтказган.
Изоҳ (0)