Ўзбекистонда ўрнатилган карантин вазиятидан фойдаланган ҳолда бир қатор шахслар уйма-уй юриб, коронавирусга қарши дезинфекция хизматларини таклиф этмоқда. ИИВ уларга ишонмасликка ва бу ҳолатнинг олдини олиш учун аҳолидан бегоналарни уйга киритмасликка чақирди.
Ижтимоий тармоқ фойдаланувчиларидан бирининг ёзишича, скафандр ва ниқоблар таққан нотаниш шахслар дезинфекция хизматидан эканлигини айтиб, эшикни очишни талаб қилмоқда. Унга ишониб, эшикни очган одамларда бу салбий оқибатлар билан якунланган ҳолатлар ҳам бўлгани таъкидлаган.
Вазирлик хабарида айтилишича, катталар ишда бўлган вақтда болалар уйда ёлғиз қолади. Худди шундай ҳолатлар қариялар билан ҳам кузатилади. Улар жуда ишонувчан, шу боис нопок инсонлар учун алдаш қийинчилик туғдирмаслиги мумкин.
«Шунинг учун катта ёшдагилардан бегоналарни уйга киритмасликни илтимос қиламиз, ҳатто улар коронавирус инфекциясига қарши дезинфекция ишларини ўтказишимиз керак, деган ҳолатда ҳам ишонмасликка чорлаймиз, чунки бу жиноят мақсадида келтирилган баҳона бўлиши мумкин.
Бу каби талаб билан уйингизга бирон-бир кимса келган тақдирда ‘102’ қисқа рақамига ёки ҳудудингизда фаолият юритувчи профилактика инспекторига қўнғироқ қилишингизни сўраймиз», — дейилади хабарда.
Изоҳ (0)