16 март куни Сурхондарё вилояти Ангор туманида содир бўлган йўл-транспорт ҳодисаси оқибатида бир пиёда ҳалок бўлди. Бу ҳақда вилоят ИИБ ахборот хизмати хабар берди.
Маълумотларга кўра, кўнгилсиз ҳодиса соат 21:15 лар атрофида «Юқори-Хўжақия» маҳалласи ҳудудидан ўтувчи йўлнинг 1426-километрида содир бўлган. «Гулистон» маҳалласида яшовчи Р.Ф. бошқарувидаги Cobalt русумли автоулови билан йўлни ўнгдан чапга кесиб ўтаётган пиёда — Б.М. исмли аёлни туртиб юборган.
Фуқаро Б.М. суд-тиббий экспертизасининг 17 март кунидаги хулосасига кўра, «ҳаёт учун хавфли бўлган оғир» тан жароҳати оқибатида касалхонада вафот этган.
Таъкидланишича, 17 март куни мазкур ҳолат юзасидан Р.Ф.га нисбатан Жиноят кодексининг 266-моддаси 2-қисми («Транспортнинг хавфсиз ишлашини таъминлашга доир қоидаларни бузиш») билан жиноят иши қўзғатилган.
Аввалроқ пойтахтнинг Юнусобод туманида содир бўлган ЙТҲ оқибатида пиёда ҳалок бўлгани ҳақида хабар берилганди. ИИВ ЙҲХББнинг маълум қилишича, Ўзбекистонда 2020 йилнинг январь—февраль ойларида 802 та ЙТҲ содир бўлгани, уларнинг 255 таси ўлим билан якунланган.
Изоҳ (0)