Қозоғистонда коронавирус касаллигини юқтириб олиш билан боғлиқ яна иккита ҳолат қайд этилди. Бу ҳақда мамлакат Соғлиқни сақлаш вазирлиги расмий вакили Диас Аҳметшарип маълум қилди.
Коронавирус аниқланган янги икки бемордан бири Олмаотада, у 10 март, сешанба куни, Москвадан учиб келган, хусусий тадбиркор. Шунингдек, Польшадан Қозоғистон пойтахти Нур-Султонга учиб келган аёлда ҳам коронавирус инфекцияси аниқланган.
Tengrinews’нинг ёзишича, ҳозирда Қозоғистонда коронавирус юқтириб олганлар сони олти нафар. 1090 киши касалхонага ётқизилган, 452 киши уй карантинида.
Аввалроқ, 13 март куни Германиядан учиб келган икки қозоғистонликда вирус аниқлангани маълум қилинган эди. Улардан бири (1974 йилда туғилган эркак) 9 март куни, иккинчиси (1984 йилда туғилган аёл) 12 март куни Қозоғистонга келган.
Шунингдек, 12 март куни Москва орқали Италиянинг Милан шаҳридан Нур-Султонга қайтган аёлда ҳамда 13 март, жума куни, Германиядан Олмаотага учиб келган 1976 йилда туғилган эркакда ҳам коронавирус аниқлангани ҳақида хабар берилган эди.
Изоҳ (0)