Қирғизистон Хавфсизлик кенгаши 16 мартдан бошлаб мамлакатдаги барча мактаблар ва олий таълим муассасаларини уч ҳафталик карантинга ёпиш тўғрисида қарор қабул қилди. Бу ҳақда Қирғизистон президенти матбуот хизмати хабар бермоқда.
Хабар беришларича, президент Сўронбой Жээнбеков 14 март куни бир қатор давлат органлари раҳбарлари ва ҳукуматнинг ҳудудлардаги вакиллари иштирокида Хавфсизлик кенгашининг тор доирадаги йиғилишини ўтказган.
Президент Сўронбой Жээнбеков мамлакат аҳолисининг саломатлиги — биринчи галдаги масала эканини таъкидлаб ўтган. У Қирғизистондаги коронавирус билан боғлиқ вазият унинг шахсий назоратида экани, турли давлат органларидан ҳар соат ахборот келиб турганини билдирган.
Ўз навбатида, Қирғизистон Фан ва таълим вазирлиги мамлакатда мактабгача таълим муассасалари (болалар боғчалари)ни ёпиш бўйича қарор йўқлигини маълум қилди. «Ҳозирча уларни карантинга олиш бўйича кўрсатма бўлгани йўқ», — дея маълум қилди вазирлик матбуот хизмати.
Маълумот учун, Қирғизистонда шу кунгача коронавирус билан касалланиш ҳолати қайд этилмаган. Минтақа давлатлари орасида ҳозиргача бундай ҳолат фақат Қозоғистонда аниқланган.
Изоҳ (0)