Россиянинг Волгоград шаҳрида ўқиётган ўзбекистонлик талаба Жасурбек Ражабов 2019 йилда Волга дарёсида чўкаётган америкалик эркак ва унинг 7 ёшли ўғлини қутқариб қолгани учун медал билан тақдирланди. Бу ҳақда «V1.ru» хабар берди.
Талабанинг нашрга берган интервьюсида айтишича, унинг Ўзбекистонда яшаётган ота-онаси юз берган ҳодиса ҳамда унинг тақдирланишидан бехабар.
22 ёшли Жасурбек Волгоград давлат аграр университетида қутқарувчилик бўйича таҳсил олади. Ўтган йили ёзги амалиётда у Волгоград вилоятининг Даниловский туманидаги «Бобри» пляжида бўлган. Пляжда чўкаётган одамларни кўргач, Жасурбек ёрдам беришга шошилган.
«У ерда ота-бола бор эди. Улар 3 метр чуқурликда эди. 7 ёшли бола умуман сузишни билмасди. Отаси ҳам сузишни билмас экан», — деди ёш қутқарувчи.
Ражабов «Ҳалок бўлаётганларни қутқаргани учун» медали билан тақдирланди.
У тақдирланиш чоғида ўзи қутқарган оила Волгоградга Филадельфия (АҚШ)дан келганини билган.
Изоҳ (0)