Тошкент халқаро аэропортида 60 минг АҚШ доллари миқдоридаги қалбаки пулни олиб кирмоқчи бўлган шахс қўлга олинди. Бу ҳақда Давлат божхона қўмитаси матбуот хизмати хабар берди.
Маълум қилинишича, хориждан учиб келган фуқаронинг безовталаниши божхоначилар эътиборини тортган ва унинг юклари текширилганда 60 минг доллар яширилганлиги аниқланган.
Йўловчи божхона декларацияси ва божхона ходимларининг оғзаки сўрови пайтида бу ҳақда маълум қилмаган, божхона назоратидан яширинча олиб ўтишда тўхтатиб қолинган ушбу валюталарни синчиклаб кўздан кечириш давомида купюраларнинг барчаси қалбаки эканлиги фош бўлган.
Буни қалбаки купюраларни аниқлайдиган валюта детектори ҳам тасдиқлаган, купюраларнинг серия рақамлари бир хил эканлиги ҳам уларнинг барчаси қалбаки эканлигини ошкор этган.
Жиноят кодексининг 176-моддасига биноан қалбаки пул, акциз маркаси ёки қимматли қоғозлар ясаш, уларни ўтказиш учун жиноий жавобгарлик белгиланган.
Айни вақтда сохта долларлар ашёвий далил сифатида олиниб, ҳолат юзасидан жиноят иши қўзғатилган.
Аввалроқ қашқадарёлик фуқаро сохта пул ясаб, банкдаги қарздорлигини «ёпиш»га урингани, Тошкент вилоятида сохта купюраларни муомалага киритмоқчи бўлган шахслар қўлга олингани ҳақида хабар берилган эди.
Изоҳ (0)