Латвияда янги турдаги COVID-19 коронавируси билан касалланишнинг илк ҳолати қайд этилди. Бу ҳақда мамлакат юқумли касалликлар хавфини таҳлил қилиш ва профилактикаси департаменти директори Юрий Перевошиковнинг сўзларига асосланиб, «РБК» хабар берди.
Қайд этилишича, латвиялик аёл вирусни Италияда юқтириб олган. Латвияга у оиласи билан Мюнхен орқали учиб келган. Самолётда 145 нафар йўловчи бўлган, улардан 24 нафари касалланган аёлга яқин жойда ўтирган. Улардан саккиз нафари ҳам Латвия фуқаролари. Қолган йўловчилар коронавирусни юқтирган аёл билан алоқада бўлганлар сифатида кўрилмаяпти.
«Яхши янгилик шундаки, 29 февраль куни, парвоз вақтида беморда касаллик аломатлари кузатилмаган», — дейди Перевошиков. Унинг таъкидлашича, шу муносабат билан қолган йўловчиларда касалликни юқтириш эҳтимоли жуда кам, бироқ шундай бўлса ҳам ҳукумат бемор аёлга яқин ўтирган одамларни ҳам назоратга олади.
Перевошиковнинг айтишича, бемор аёлнинг оиласи аэропортдан чиқиб, шахсий машинасида уйига йўл олган ҳамда бошқа ҳеч ким билан мулоқотда бўлмаган.
Ҳозирда аёлнинг оила аъзолари ҳам уйда карантинга олинган.
Шунингдек, Марокашда ҳам коронавирус билан касалланишнинг илк ҳолати қайд этилган.
Илк бемор Италияда яшовчи Марокаш фуқароси бўлган.
Марокаш соғлиқни сақлаш вазирлигининг маълумотига кўра, ҳозирда у Касабланкадаги шифохонада даволанмоқда. Эркакнинг аҳволи оғир эмас.
Аввалроқ, Австралия, Арманистон ва Россияда коронавирусга чалинишнинг илк ҳолатлари қайд этилгани ҳақида хабар берилган эди.
Эслатиб ўтамиз, Хитойда коронавирус билан касалланганлар сони 80,1 минг кишидан ошиб кетди. Бутун дунё бўйлаб коронавирусни юқтириб олганлар сони эса 90 370 кишига етган. Касалликка чалинганлар сони бўйича Хитойдан кейинги ўринларда Жанубий Корея (4335), Италия (2036) ва Эрон (1501) кетмоқда. Жаҳон соғлиқни сақлаш ташкилотининг маълум қилишича, дунёнинг 64 давлатида коронавирус аниқланган.
Экспертлар жаҳон иқтисодиёти коронавирус сабаб икки бараварга пастлашини прогноз қилди.
Мавзуга доир:
- Италияда коронавирус қурбонларининг сони 52 нафарга етди
- Москва шаҳри мери коронавирус сабаб 24 нафар россияликнинг касалхонага ётқизилганини эълон қилди
- Сунъий интеллект коронавирус юқтириб олганларни аниқлашда ёрдам беришни бошлади
- Ўзбекистондаги барча мактабларда коронавирусга қарши чоралар кучайтирилади