АҚШ президенти Дональд Трамп «Толибон» жангарилари билан битим тузишга умид қилаётганини билдирди, чунки томонлар низолардан чарчаган ва тинчликни исташмоқда, деб хабар беради «РИА Новости».
Фото: Reuters
«Биз Афғонистонда 19 йилдан бери бормиз. Ўйлашимизча, улар келишув истамоқда. Биз ҳам буни хоҳлаймиз. Фикримча, бу иш бера бошлади. Улар жангдан чарчади. Келишув битими остида ўз имзомни қўйган бўлардим», — дейди Трамп.
АҚШ давлат департаментининг Майкл Помпеога таяниб маълум қилишича, АҚШ «Толибон» ҳаракати билан 29 февраль куни тинчлик битимини имзолашга тайёрланмоқда. Аввалроқ АҚШ жангарилар билан Афғонистондан жанговар ҳаракатларни етти кунга тўхтатиш масаласини муҳокама қилганди. Ушбу муддат ичида «Толибон» портлашлар ва ракета ҳужумларини амалга оширмасликка ваъда берган. «Толибон» ҳаракати вакиллари зўравонликни тўхтатиш ҳақидаги келишувни бузса, АҚШ Афғонистон ҳукуматига ҳарбий кўмак кўрсатади.
2019 йилнинг сентябрида АҚШ президенти Дональд Трамп «Толибон» ҳаракати билан келишувнинг имкониятларини «ўлик» деб баҳолаган эди. Вашингтон «Толибон» ҳаракати билан музокаралар қайта бошлаши мумкинлигини 22 ноябрда эълон қилган. 29 ноябрда норасмий ташриф билан «Баграм» авиабазасига келган Трамп «Толибон»нинг тинчлик келишувини имзолашга тайёрлигини билдирган. Ушбу баёнотни ҳаракат вакиллари ҳам тасдиқлаган. 4 декабрда АҚШ давлат департаменти мамлакатнинг махсус элчиси Залмайнинг Доҳада ўтаётган Афғонистондаги ички низоларни баратараф этиш ва тинчлик ўрнатиш бўйича музокараларга қўшилишини маълум қилган.
