IMEI-кодларни рўйхатдан ўтказиш учун тўловларни бекор қилиш ҳақидаги петиция парламентда кўриб чиқиш учун етарли овоз тўплади

«Менинг фикрим» жамоавий мурожаатлар порталида мобил қурилмаларнинг IMEI-кодларини рўйхатдан ўтказишни соддалаштириш ҳақида петиция эълон қилинган эди.

Мурожаатда жисмоний ва юридик шахслардан мобил қурилмаларнинг IMEI рақамларини рўйхатга олиш учун аҳолидан ундириладиган тўловларни бекор қилиш ва рўйхатга олишни янада соддалаштириш тартибини жорий этиш сўралган.

Парламент мурожаатни кўриб чиқиши учун у энг камида 10 мингта овоз тўплаши лозим эди. Петиция тўплаган овозлар сони 12 мингдан ошди. Овоз бериш 89 кундан кейин якунига етади.

Эслатиб ўтамиз, 2019 йилнинг сентябрида ҳукумат қарори билан Ўзбекистон ҳудудида фойдаланилаётган, сотиш ёки шахсий фойдаланиш учун олиб кириладиган ва ишлаб чиқариладиган мобил қурилмаларни рўйхатга олиш тартиби тўғрисидаги низом тасдиқланган эди. Низомга кўра, мобил қурилмаларни рўйхатга олиш тизим оператори ёки тизим рўйхатга олувчисига мурожаат бўйича амалга оширилади. Бу эса кўплаб муаммоларни келтириб чиқараётгани маълум қилинганди.