13 февраль куни Варшавада Ўзбекистон бандлик ва меҳнат муносабатлари вазири Нозим Ҳусанов Польша меҳнат инспектори Веслав Лишчек билан учрашди. Бу ҳақда вазирлик матбуот хизмати хабар берди.
Музокаралар жараёнида Польша ҳудудида меҳнат фаолиятини амалга ошираётган Ўзбекистон фуқароларининг меҳнат ҳуқуқларини ҳимоя қилиш ва ташкиллаштирилган меҳнат миграцияси тизимини жорий этиш, шунингдек, Польша ҳудудида меҳнат фаолиятини амалга ошириш учун рухсатнома олиш тартибини соддалаштириш масалалари муҳокама қилинган
Таъкидланишича, учрашувда икки мамлакат Меҳнат инспекциялари ўртасида тажриба алмашинувини йўлга қўйиш ва Ўзбекистонда меҳнат қонунчилигига риоя қилишни назорат тизимига замонавий тажрибани жорий қилиш мақсадида ҳамкорлик қилишга келишиб олинган.
Музокара якунида Польша Меҳнат инспекцияси меҳнат муносабатлари қонунчилиги бузилиши ҳолатлари бўйича ўзбекистонлик фуқаролардан мурожаатлар келиб тушган тақдирда уларнинг меҳнат ҳуқуқларини ҳимоя қилишда ёрдам кўрсатишга тайёр эканлигини таъкидлаб ўтган.
Эслатиб ўтамиз, 2019 йил давомида ўзбекистонлик мигрантлар Москва бюджетига миллиардлаб рубл фойда келтирган. Шу билан бирга 2020 йилдан Москвада меҳнат мигрантларининг ишлаш ҳуқуқи учун патент 7 фоизга қимматлашган.
Изоҳ (0)