Бозорларда гўшт, сут ва улардан тайёрланган маҳсулотлар билан савдо қилишда ветеринария-санитария қоидаларига риоя қилиниши юзасидан Ғиждувон туманидаги деҳқон бозорида ўтказилган тадбирлар давомида фуқаро Ш.А. 4 нафар аёлни ёллаб, уй шароитида қўлбола усулда тайёрланган 42 дона бир литрли банкадаги сариёғ маҳсулотини ҳеч қандай ветеринария ҳужжатларисиз сотаётганликлари аниқланган. Бу ҳақда Бухоро вилоят ИИБ ахборот хизмати хабар бермоқда.
Ушбу маҳсулотдан намуна олиниб текширилганда унинг истеъмолга яроқсиз эканлиги маълум бўлган. Шу сабабли олинган сариёғ маҳсулотлари ветеринария мутахассислари томонидан тегишли тартибда йўқ қилинган.
Шунингдек, Бухоро вилоят ИИБ ППХ ва ЖЦБ карантин тадбирларини таъминлаш бўлинмаси ва ЙҲХБ ходимлари томонидан Ғиждувон тумани «Сармижон» ЙПХ масканида ўтказилган тадбирлар давомида 13 февралга ўтар кечаси Бухоро—Навоий йўналишида ҳаракатланиб келаётган Қорақалпоғистон Республикасининг Тўрткўл шаҳрида яшовчи 1982 йилда туғилган М.А. бошқарувидаги Epica русумли автомашина юкхонаси текширилганда, жами 124 килограмм оғирликдаги мол гўштини ҳеч қандай ҳужжатларсиз олиб кетаётганлиги аниқланган.
Ғиждувон туман ветеринария лабораториясининг хулосасига кўра ушбу гўшт маҳсулоти истеъмолга яроқсиз эканлиги маълум бўлган.
Ҳар иккала ҳолатда ҳам ҳуқуқбузарларга нисбатан «Маъмурий жавобгарлик тўғрисида»ги кодекснинг 109-моддасига (Ветеринария, ветеринария-санитария қоидалари ва нормаларини бузиш) асосан маъмурий баённома расмийлаштирилди.
Изоҳ (0)