Пойтахт ИИББ имконияти чекланган йигитни клиникага олиб келган ҳайдовчининг жаримага тортилгани юзасидан баёнот берди

Тошкент шаҳар ИИББ тармоқларда имконияти чеклаган фуқарони Damas’да олиб кетаётган ҳайдовчининг ЙПХ ходими билан можароси тасвирланган видео юзасидан баёнот берди.

Тошкент шаҳар ИИББ ЙҲХБ ЙПХ инспектори лейтенант Жалолиддин Каттахўжаевнинг бодикамерасига ёзиб олинган видеога кўра ҳайдовчи ва инспектор ўртасидаги тортишув 13 январь куни содир бўлган. Соат 10:10 да Юнусобод тумани Осиё кўчасида инспектор томонидан Lor Medical Service клиникаси ёнида «Тўхташ тақиқланади» йўл белгиси ҳудудида Damas тўхтагани қайд этилган.

Йўл қоидасини бузган ҳайдовчига нисбатан маъмурий далолатнома тузилган ва базавий ҳисоблаш миқдорининг 3 баробари қийматида (669 минг сўм) жаримага тортилган.

Имконияти чекланган йигитнинг отаси Facebook’да қолдирган постида айтилишича, инспектор ҳолатни кўриб туриб жарима ёзган. Ҳаттоки ўткинчи эркак ҳам ЙПХ инспекторига ҳолатни тушунтиришга уринган. Аммо тушунтиришга уринишлар бефойда кетган.

Тошкент шаҳар ИИББ матбуот хизматининг ёзишича, автомобиль ҳайдовчиси имконияти чекланган фуқарони клиникага олиб келганини айтмасдан клиникадаги автотураргоҳда жой қолмагани сабаб шу ерда тўхташга мажбур бўлганини билдирган. Лейтенант эса йўл қоидасининг бузилишига нисбатан далолатнома тузиш ўзининг хизмат мажбурияти эканлигини, буни эътиборсиз қолдира олмаслигини маълум қилган.

«Биз ушбу видео остига қолдирилган изоҳларга эътибор қаратдик. Кўпчилик ҳар қандай қоидабузарлик сабабсиз бўлмаслигини, ЙПХ ходими ҳайдовчини тушуниши кераклигини ёзган. Таъкидлаш жоизки, ЙПХ ходимлари тез-тез бу каби масалаларда ҳайдовчиларга ён босади. Агар ушбу ҳолатда ҳам ҳайдовчи вазиятни тўлиқ тушунтирганида шундай бўларди. Шунга қарамай, юқоридаги изоҳлар пойтахт йўлларида автомобиль ҳайдашнинг ҳозирги маданиятини акс эттиради: ҳар бир ҳайдовчи ўзини айбсиз ҳисоблайди ва унинг қоидабузарлигига ЙПХ инспекторлари эътиборсиз қолдириши керак, дейди. Аммо биз бу ҳақда ўйлаб кўришни таклиф қиламиз: аксарият ҳолларда ҳайдовчи йўл ҳаракати қоидаларини бузилишининг олдини олиши, амалдаги қонунчиликни ҳисобга олган ҳолда вазиятни олдиндан кўра билиш имкони мавжуд», — дейилади Тошкент шаҳар ИИББ баёнотида.