«Халқ банки» Яккабоғ тумани филиали ходимларининг иш ҳақини тўлади. Damas банкка қайтарилди

АТ «Халқ банки» Яккабоғ туман филиали ходимларининг иш ҳақини тўлаб бериб, Damas автомобилини қайтариб олди. Бу ҳақда «Дарё»га МИБ Қашқадарё вилояти бошқармаси ахборот хизмати маълум қилди.

Маълум бўлишича, банк 3 нафар ходимининг қарийб 6 миллион сўм ойлик маошини 12 миллион 954 минг сўм қилиб, моддий зарари билан қўшиб тўлаган.

МИБ вилоят бошқармаси ахборот хизмати раҳбари Гулноза Дилмуродованинг айтишича, 2020 йил 15 январь куни банк ходимларининг бекор юрган вақти учун ойлик тўловларидан ташқари моддий зарар ва адвокатлик хизмати учун сарфланган маблағларни ҳам қўшиб тўлаган.

Эслатиб ўтамиз, аввалроқ АТ «Халқ банки»нинг Яккабоғ туман филиали ходимларининг иш ҳақини тўламагани учун МИБ Damas автомобилини олиб қўйгани ҳақида хабар бергандик.