Тошкент прокуратураси Наримон Григоряннинг мурдаси акс этган видеоролик учун узр сўради
Тошкент шаҳар прокуратураси томонидан 2020 йилнинг 15 январь куни ижтимоий тармоқларда, хусусан, Instagram, Facebook тармоқлари ҳамда Telegram каналларига жойлаштирилган видеоролик юзасидан расмий баёнот берилди.
Қайд этилишича, ушбу видеороликлар иш ўрганувчиларни жиноят содир бўлган воқеа жойига олиб чиқиб ўқитиш жараёнида олинган суратлар асосида ички хизматда фойдаланиш учун тайёрланган. Оператор хатоси туфайли расмий каналга жойлаштириш учун тайёрланган 4 та материал билан биргаликда юкланган.
«Тошкент шаҳар прокуратураси зудлик билан ушбу видеороликни расмий каналдан олиб ташлаш чораларини кўрди ва фуқаролардан мазкур ҳолат учун узр сўрайди», — дейилади баёнотда.
Эслатиб ўтамиз, Тошкент шаҳар прокуратураси Telegram’даги каналида 14 январь куни ўлдириб кетилган таниқли дизайнер Наримон Григоряннинг қонга ботган мурдасининг сурати ҳам акс этган видеослайд эълон қилди, сўнг ўчириб ташлади. Шунга қарамай, шаҳар прокуратураси эълон қилган видеослайддан кадрлар интернетда тарқалишга улгурган.
Маълум бўлишича, 14 январь куни Яшнобод туманида бир эмас, иккита қотиллик юз берган (бири — дизайнер Наримон Григоряннинг ўлдирилиши). Тошкент шаҳар прокуратураси эълон қилган видеослайдда ҳар икки ҳолатдаги мурдаларнинг суратлари кўрсатилган эди. Бундан ташқари, ўликлардан бирининг ўликхонада кўздан кечирилиши кадрлари ҳам илова қилинган бўлиб, унда ҳатто мурданинг жинсий аъзолари ҳам хиралаштирилмаган эди.Пойтахт прокуратурасининг Telegram’идаги видеохабарга ижтимоий тармоқларда танқидий муносабатлар билдирила бошлагач, видео ҳам, унга қилинган қилинган матнли хабар ҳам каналдан олиб ташланди. Ҳолатга билдирилган танқидий фикрларнинг бирида «Ташкилот пиар-хизматида пиарчилар эмас, прокурорлар ишласа, мана шунақа бўлади», дейилган.
