51-Хиёбонтепа сайлов округидан халқ депутатлари Тошкент шаҳар кенгаши депутатлигига сайланган «Нуроний» жамғармаси Тошкент шаҳар кенгаши раиси Рустам Калонов кенгашнинг Регламент ва депутатлик одоби масалалари бўйича доимий комиссияси раиси этиб тайинланди. У халқ депутатлари Тошкент шаҳар кенгаши янги таркибининг 13 январь куни бўлиб ўтган биринчи сессиясида комиссия раислигига тайинланди. Тошкент шаҳар ҳокимлиги маълумотларига кўра, Калонов бошлиқ комиссия таркибидан яна тўрт киши ўрин олган.
Улар — Тошкент ирригация ва қишлоқ хўжалигини механизациялаш муҳандислари институти ректори Ўктам Умурзоқов (9-Салор сайлов округидан Тошкент шаҳар кенгашига сайланган депутат), Сенат раиси Танзила Норбоева (25-Себзор сайлов округидан Тошкент шаҳар кенгашига сайланган депутат), АGMК футбол клуби бош мураббийи Миржалол Қосимов (20-Толариқ сайлов округидан Тошкент шаҳар кенгашига сайланган депутат), Ўсимлик моддалари кимёси институти директори Шомансур Саъдуллаев (11-Зиёлилар сайлов округидан Тошкент шаҳар кенгашига сайланган депутат).
Шаҳар кенгаши сессиясидан сўнг «Дарё» мухбири Мусулмонбек Иброҳимовга интервью берган Рустам Калонов келгуси беш йилликда одоб-ахлоқ масаласига қатъий эътибор қаратилиши, ҳар бир фуқаронинг ҳурматини, ҳуқуқларини таъминлаш йўлида иш олиб борилишини таъкидлади.
Одоб-аҳлоқ аслида ҳаммага, айниқса, лавозимда ўтирганларга тааллуқли масала. Президентимизнинг ишончини қозонаман деган киши аҳлоқни аввало ўзидан ва оиласидан бошлаши керак.Халқ билан, идоралар билан гаплашаётганда маданиятини юқори қилиб, мулоқот қилишни ўрганиши лозим. Ҳоким, вазир, умуман раҳбар бўламан деган инсон борки, ўзини шу нарсаларга тайёрлаб бориши керак.
Келгуси беш йилликда, ким бўлишидан қатъий назар, одоб-аҳлоқ масаласида қатъий турамиз. Ҳар бир фуқарони ҳурмат қилиш, унинг ҳуқуқларини таъминлаш йўлида иш олиб борамиз.
Рустам Калонов, халқ депутатлари Тошкент шаҳар кенгаши депутати
Бир муддат аввал Тошкент шаҳар ҳокими Жаҳонгир Ортиқхўжаев ва ОАВ ходимлари билан боғлиқ нохуш воқеалар қайд этилган эди. «Дарё» мухбирининг ҳокимни янги муддатга тасдиқлашда ўша воқеаларга қанчалик эътибор қаратилди, деган мазмундаги саволига Рустам Калонов шундай жавоб қайтарди:
«Жаҳонгир Ортиқхўжаев яхши тадбиркор, лекин ҳокимият тизимида ишламаган. Бағрикенг, етимпарвар, халқпарвар одам. Виждони, кўнгли тоза бўлгани учун ОАВ билан: ‘Қани, камчилигим бўлса айтинглар, нимани нотўғри қилдим?’, деб очиқ суҳбатлар ҳам қилди».Маълумот учун, Ўзбекистон Халқ демократик партияси аъзоси ҳисобланган Рустам Калонов «Ўзбекистон» телеканалининг «Муносабат» кўрсатуви 31 июль сонидаги чиқишидан сўнг айниқса машҳур бўлиб кетган эди.
«Дунё бўйича лидеп ғояси (либерал ғояларни назарда тутган — «Дарё») инқирозга учраяпти, буни яхши биласиз. Кулманг сиз! Нимагаки, бутун ахлоқсизлик, аҳмоқгарчилик, эркак билан эркакнинг, хотин билан хотиннинг яшашлари мана шу лидеплардан чиқяпти», — деганди Рустам Калонов.
Унинг бундай чиқишидан сўнг Ўзбекистон Халқ демократик партияси ушбу ҳолат учун кенг жамоатчилик, хусусан, Ўзбекистон Либерал-демократик партияси ташкилотлари ходимлари, депутатлари ҳамда кўп минг сонли аъзоларидан узр сўраган эди.
Изоҳ (0)