Ўзбекистон 2019 йилда туристик хизматлардан қанча даромад топгани маълум қилинди
Ўзбекистонга 2019 йилда 6 748 500 нафар сайёҳ ташриф буюрган бўлиб, ушбу кўрсаткич 2018 йилда 5 346 200 нафарни ташкил қилган. Бу ҳақда 10 январь куни «Тараққиёт стратегияси маркази»да Туризмни ривожлантириш давлат қўмитаси томонидан ўктазилган брифингда маълум қилинди, дея хабар бермоқда «Дарё» мухбири.
Таҳлилларга кўра, ўтган йили Ўзбекистонга энг кўп туристлар МДҲ мамлакатлари — Қозоғистон, Тожикистон, Қирғизистон, Туркманистон, Россия, шунингдек, Туркия, Афғонистон, Хитой, Жанубий Корея, Ҳиндистон каби давлатлардан келган. Сайёҳларнинг 51,3 фоизи 31—35 ёшдаги кишилар бўлган.
«Юртимизга ташриф буюрганларнинг 81,8 фоизи қариндош-уруғ ва дўстларини зиёрат қилишга, 15,5 фоизи эса дам олиш учун келганлардан иборат. Бошқа сабаблар, жумладан, даволаниш, харидлар, бизнес учрашувларда иштирок этиш ҳамда таълим олиш мақсадида келган хорижликлар сони 2,7 фоизни ташкил этди. Энг кўп сайёҳ Бухоро, Тошкент шаҳри, Самарқанд ва Хоразм вилоятларига ташриф буюрган.
Мамлакатимиз туризм салоҳиятини дунё жамоатчилиги орасида кенг тарғиб этиш мақсадида АҚШ, Япония, Германия, Италия, Хитой, Индонезия, Россия ва бошқа давлатлардан жами 30 та ОАВнинг 160 нафардан зиёд вакилининг ташрифи ташкиллаштирилди. Анъанавий тарғибот усуллари билан бир қаторда замонавий тарғибот усулларидан ҳам фойдаланяпмиз. Хусусан, 17—21 декабрь кунлари Токио шаҳридаги Сибуя майдони ва Нагоя темирйўл вокзалида Ўзбекистон туризм салоҳиятини тарғиб қилувчи видеоролик намойиш этилди», — деди Туризмни ривожлантириш давлат қўмитаси раиси вазифасини бажарувчи Абдулазиз Оққулов.
Қўмита раҳбарининг айтишича, 2019 йилдан бошлаб ҳар бир ҳудуднинг ўзига хослигидан келиб чиққан ҳолда турли оммавий тадбирлар ташкил этиш йўлга қўйилди. Жумладан, Зиёрат туризми форуми (Бухоро вилояти), Бахшичилик санъати фестивали, Археология форуми (Сурхондарё вилояти), Баҳодирлар ўйини (Хоразм вилояти), «Мўйноқ» авторалли, «Стихия» мусиқа фестивали (Қорақалпоғистон Республикаси), МДҲ туризм ярмаркаси, (Самарқанд вилояти), Геотуризм форуми, Анор фестивали (Қашқадарё вилояти), Электрон мусиқа фестивали, Гастрономик фестиваль, «World Influencers Congress» (Тошкент шаҳри) каби йирик тадбирлар ўтказилди.
Тадбирда таъкидланишича, 2019 йилда туристик хизматлар экспорти кўрсаткичи 1,3 миллиард долларни ташкил қилиб, бу 2018 йилга нисбатан (1 миллиард доллар) 26,1 фоизга ўсган.
