Mercedes-Benz АҚШдан 745 минг дона машинани чақириб олади

Daimler АG автомобилсозлик концерни Америка бозорларидан 745 минг дона Mercedes-Benz автомобилларини қайтариб олишини маълум қилди, деб хабар беради Reuters.

Бу каби қарор автомобиль томидаги люкидаги нуқсон сабаб қабул қилинган: уни қоплаб турувчи материал вақт ўтиши билан яроқсиз ҳолга келиб, ҳаракат вақтида люкнинг узилиб тушишига сабаб бўлиши мумкин.

Қайтариб олинадиган машиналар қаторидан 2001 йилдан 2011 йилга қадар ишлаб чиқарилган C, CLK, CLS ва E классидаги моделлар ўрин олган.

Маълумот учун, ҳар йили Mercedes-Benz компанияси АҚШда 350 мингдан ортиқ автомобиль сотади.