Ўзбекистонда 2019 йил 1 февралдан бошлаб Соғлиқни сақлаш вазирлиги тизимида тиббиёт ходимлари фақат тўлиқ ставкада ишга қабул қилиниши белгиланган, бироқ мазкур талаб бажарилмаяпти.
Бу ҳақда Коррупцияга қарши курашиш бўйича Республика идоралараро комиссиясининг 25 декабрь куни бўлиб ўтган кенгайтирилган йиғилишида бош прокурор Ниғматилла Йўлдошев айтиб ўтди.
Тиббиёт ходимларини фақат тўлиқ ставкада ишга қабул қилиш тўғрисидаги соғлиқни сақлаш вазирининг 2019 йил 21 январдаги буйруғидан сўнг, 68 та муассасада ўрганиш ишлари олиб борилган.
Маълум бўлишича, қарийб 2 минг нафар ходим чорак, 3 800 нафари эса ярим ставкада ишламоқда. Биргина Республика ихтисослаштирилган акушерлик ва гинекология илмий-амалий марказида 92 та штат бирлигида 152 шифокор ва 162 та штат бирлигида 219 ҳамшира ишлаяпти.
Соғлиқни сақлаш вазирлиги маълумотига кўра, бугунги кунда Ўзбекистонда тиббиёт соҳасида жами 12 916 нафар (шундан 2 894 нафар умумий амалиёт ва 10 022 нафар тор доирадаги) мутахассис етишмайди.
«Тиббиёт коллежларини битириб, ишсиз юрган ёшлар сони жуда юқори. Шундай бўлса-да, Ўзбекистон бўйича 4,5 мингта ўрта ва кичик тиббиёт ходимлари штат бирликлари тўлдирилмаган.Хусусан, Сурхондарёда ҳамшира ва кичик тиббиёт ходими бўш иш ўринлари сони 206 та, Самарқандда 477 та, Тошкент вилоятида 582 та, Тошкент шаҳрида эса 2 213 талигича қолмоқда», — дея бош прокурорнинг сўзларидан иқтибос келтирмоқда «Дарё» мухбири.
Мавзуга доир:
- Прокуратура текширувидан сўнг Акушерлик ва гинекология марказининг айрим шифокорлари маоши 15 млн сўмгача ошди
- Бош прокурор: 19 нафар тиббиёт ходими психотроп моддалар савдоси билан шуғулланган
- Соғлиқни сақлаш вазири Сенат раиси Танзила Норбоеванинг «саломи»га жавоб қайтарди. Сенат бу жавоб устидан ҳукуматга хат йўллади
- Тошкентдаги Гинекология марказида ўрта махсус маълумотли бухгалтер бош ҳисобчилик қилган. Унинг турмуш ўртоғи вазирликда ишлаши айтилди
Изоҳ (0)