Ўзбекистонлик имконияти чекланган қизча ўз шеъри билан Central Asia’s Got Talent ҳакамларини таъсирлантирди (видео)

Central Asia’s Got Talent кўрсатувида ўзбекистонлик ногиронлиги бўлган қизалоқ Ирода Ўрозова иштирок этди ҳамда ўзи ёзган шеърини ўқиб ҳакамларни таъсирлантирди.

Сурхондарёлик Ирода Ўрозова Тошкент шаҳрининг Қўйлиқ даҳасида яшайди. У 6-синфда ўқийди, шеърлар ёзишга қизиқади.

«Тушгача мактабда ўқийман. Тушдан кейин эса бўш вақтим бўлади. Айнан шу вақтда шеър ёзаман», — дейди Ирода.

«Мен бу қўлларим билан мустақил равишда ҳамма нарса қила оламан. Китобни ушлай оламан, шеър ёза оламан. Ҳаётдаги мақсадим менга барча имкониятларни яратиб бераётган ота-онамнинг ишончини оқлаш. Келажакда журналист бўлишни орзу қиламан. Ниятим — Ватанимга хизмат қиладиган фарзанд бўлиш», — дейди Ирода.

Ирода ўзи ёзган шеърни ўқиб берганида барча ҳакамлар унга тасанно айтди ҳамда қизчанинг кейинги босқичга ўтишини маълум қилди.