Калифорнияда ўрмон ёнғинлари туфайли 200 мингдан ортиқ аҳоли эвакуация қилинмоқда

АҚШнинг Калифорния штатида 200 мингдан ортиқ аҳоли кучайиб бораётган ўрмон ёнғинлари туфайли эвакуация қилинмоқда. Бу ҳақда CNN телеканали маълум қилди, дея хабар беради «Известия».

27 октябрь, якшанба куни Калифорния губернатори Гэвин Ньюсом штатнинг барча ҳудудида фавқулодда ҳолат эълон қилди. 58 округдан 43 тасида хавфнинг юқори, «қизил» даражаси белгиланган.

Расмий маълумотларга кўра, ёнғин оқибатида 220 квадрат километр майдон ёниб битган, 80 мингга яқин бино ва иншоотлар хавф ҳудудида қолган.

Калифорнияда 500 мингдан ортиқ киши электр таъминотисиз қолди. Штат коммунал хизматлари бу рақам 1 миллион кишига етиши мумкинлиги ҳақида огоҳлантирган.

Маълумот учун, Калифорниядаги ўрмонлар 23 октябрь куни тунда аланга олган ва тезлиги сониясига 34 метрга етган кучли шамол туфайли шиддат билан тарқалган.