26 октябрь куни Туркманистон президенти Гурбангули Бердимуҳаммедов ҳукумат аъзолари иштирокида видеоселектор йиғилиши ўтказди.
Йиғилишда нефть-газ соҳасига масъул бўлган бош вазир ўринбосари Миратгелди Мередов Туркманистон ҳудудидаги ТАПИ газ қувурининг қурилиш ишларининг бориши ҳақида ҳисобот берган.
Бердимуҳаммедов Мередовга ушбу лойиҳанинг муҳим эканлигини таъкидлаб, ТАПИни Туркманистон ва бошқа давлатлар ҳудудидаги қурилишини назоратга олиб ишга жиддий ёндашишни буюрган.
Туркманистон президенти бош вазир ўринбосарига лавозим мажбуриятларини етарли даражада таъминламагани, ишда йўл қўйилган камчиликлар сабаб қаттиқ ҳайфсан берган ва бу сўнгги огоҳлантириш эканлигини таъкидлаган. Мередовнинг айнан қайси камчилик сабаб огоҳлантирилгани номаълум.
Гурбангули Бердимуҳаммедов 1 октябрда соҳада жуда кўп камчиликлар ҳамда коррупция ҳолатлари кузатилганлиги туфайли мамлакат ички ишлар вазири Искандар Муликовни ишдан олган. 2 октябрда эса хавфсизлик кенгаши йиғилишида «Туркман отлари» («Türkmen atlary») давлат бирлашмаси фаолиятини танқид қилиб, ушбу ташкилот раҳбарини ҳам ишдан бўшатгани хабар қилинган.
Мавзуга доир: Туркманистон ички ишлар вазири барча давлат мукофотларидан маҳрум қилинди. У қамалиши мумкин
7 октябрда Афғонистон иқтисодиёт вазири ТАПИ лойиҳасини амалга ошириш учун 9-12 миллиард АҚШ доллари миқдоридаги маблағ кераклигини қайд этган. Вазир ушбу маблағни топиш масъулиятини олган Туркманистон иқтисодий муаммолар сабаб ушбу фикридан қайтганини таъкидлади.
9 октябрда Ҳиндистон ҳукумати агар туркманлар минг кубометрга 350 минг доллар газ нархини минг кубометр учун 140 минг доллар туширмаса, ТАПИ лойиҳасида иштирок этишдан бош тортишини билдирган. 10 октябрда Ўзбекистон Энергетика вазирлигида электр энергетикаси, нефть-газ ва ёқилғи-энергетика мажмуаси (ЁЭМ)нинг бошқа соҳалари бўйича Ўзбекистон—Ҳиндистон ҳамкорлигини ривожлантириш масалалари муҳокама этилган.
16 октябрда Покистон вакиллари туркман гази учун нархларни қайта кўриб чиқишни таклиф қилди ва Туркманистоннинг газ қувурининг Афғонистондаги қисмида терактлар сабаб узилишлар содир бўлса йўқотишлар учун масъулиятни ўз зиммасига олишни талаб қилди.21 октябрда афғон амалдорларидан бири Афғонистонда газ қувурини қўриқлаш билан шуғулланувчи ҳукуматнинг махсус ҳарбий гуруҳлари ташкил қилинишини билдирган.
Изоҳ (0)