Тошкентнинг Юнусобод тумани, 11-даҳасида жорий йил 4 июнь куни рўй берган ЙТҲ — Nexia ҳайдовчиси бир неча болани уриб юбориши оқибатида ўсмир А.Г. ҳалок бўлгани юзасидан текширув давомида биринчи инстанция тергови томонидан қатор камчиликларга йўл қўйилган. Бу ҳақда Ички ишлар вазирининг ўринбосари — Тергов департаменти бошлиғи Дониёр Тошхўжаев брифинг чоғида маълум қилди, дея хабар беради «Gazeta.uz».
Брифингда ўсмирнинг яқинлари, гувоҳлар, терговчи ва гумонланувчи Лариса Т.нинг ҳимояси иштирок этди. Тадбир бир дақиқа сукут сақлаш билан бошланди.
Тошхўжаевга кўра, тергов жабрдийда томонни видеорегистратор ёзуви билан таништиришдан бош тортган, терговга қадар текширувни тезда якунлаган ва ишни прокуратурага оширган.
Ҳалок бўлган ўсмирнинг тоғаси Михаил Ахпержанянснинг Facebook ижтимоий тармоғи орқали Ички ишлар вазирига мурожаатидан сўнг ИИВ раҳбари жабрдийда томон билан боғланиш ва вазиятга ойдинлик киритиш юзасидан кўрсатма берган. 28 август куни ИИВ Тергов департаменти қўшимча текширувга киришган.
Дониёр Тошхўжаевнинг айтишича, жабрдийда томон видеорегистратор ёзувида монтаж бўлгани, гувоҳлар автомобиль болалар томон уч маротаба бостириб борганини кўрганини даъво қилган.
«Бундай ҳолатда иш қасддан бўлмаган жиноят сифатида баҳоланмайди. Бу ерда қасддан қотиллик аломатлари сезилмоқда. Ҳолатга аниқлик киритиш учун тергов ҳаракатларини олиб бориш, экспертиза тайинлаш, шаффофликни таъминлаш талаб этилади. Тергов эса бундай қилмаган», — қўшимча қилди Тошхўжаев.
Вазир ўринбосарининг билдиришича, аниқланган камчиликлар ва тергов қоидаларининг бузилиши сабабли уч нафар ходим ишдан бўшаш ҳақида ариза ёзган, бир нафарининг лавозими пасайтирилган.
Дониёр Тошхўжаев ҳозирда тергов 95 фоизга якунланганини маълум қилди. Терговчилар бир неча гувоҳни қайтадан сўроқ қилиши ва гумонланувчининг бошқа рақамли телефонидан амалга оширилган қўнғироқларни текшириб кўриши керак. Тергов тамом бўлганидан сўнг иш судга оширилади.