Самарқандлик тадбиркор Шерзод Бурҳонов 12 йилга қамалиши судланишидан аввал аниқ бўлган (видео, 2-қисм)

«Дарё»да Олий суд раисининг собиқ ўринбосари Баҳодир Деҳқоновнинг кўрсатмаси билан 12 йилга қамалган самарқандлик тадбиркор Президентдан нажот кутаётганлиги тўғрисида мақола эълон қилинганди.

Шерзод Бурҳонов 2017 йилнинг февраль ойида Ўзбекистон Республикаси Жиноят Кодексининг 165-моддаси 2-қисми «а, в», 168-моддаси 3-қисми «а» банди, 184-моддаси 3-қисми, 189-моддаси, 28, 211-моддаси 3-қисми «а» банди ва 243-моддасида назарда тутилган жиноятларни содир этганликда айбли деб топилиб, унга 12 йил 6 ой муддатга озодликдан маҳрум қилиш жазоси тайинланган.

«Дарё» мухбири Фарҳод Норбўтаев Самарқанд вилояти ИИБ 37-сонли манзил колониясида жазони ўтаётган маҳкум Шерзод Бурҳонов билан суҳбатлашди.

1993 йилдан якка тартибдаги тадбиркорлик фаолиятини бошлаган Шерзод Бурҳонов 2001 йилда «Мастура Алмаз бахмал» тўқув корхонасини ишга тушириб, 200 кишини иш билан таъминлаган. 2010 йилга келиб тадбиркорлик фаолиятини кенгайтириш мақсадида 150 кишига мўлжалланган «Алмаз плаза» ресторани, орадан 4 йил ўтганидан сўнг, яъни 2014 йилда тўй маросимларини ўтказиш учун 500 кишига мўлжалланган «Алмаз Золотой дворец» ресторанини ишга туширган.

— Тинимсиз меҳнат эвазига тадбиркорлик ишларим ривожланиб борди. Аммо 2016 йилнинг 29 июль куни соат тахминан 10:00 атрофида шахсий автомобилимда ишга кетаётган вақтимда қора ниқоб кийган ички ишлар ходимлари шаҳар марказида тўхтатиб, қўлларимга кишан солиб, Самарқанд вилояти ИИБга олиб келди, — дейди Шерзод Бурҳонов. — Тўғриси, бу ҳолатдан ҳайрон бўлдим. Терговчи, катта лейтенант Санъат Одиловдан нима сабабдан бу ерга олиб келганини сўрадим. Чунки ИИБ томонидан бирор марта чақирмасдан, огоҳлантирмасдан қўлларимга бирдан кишан солиб олиб келинганимни тушунмадим.

Шерзод Бурҳоновнинг айтишича, Санъат Одиловдан бу ҳақда сўраганида терговчи дўқ-пўписа қилиб, уни анчадан буён кузатиб юрганлиги, устидан кўпчилик шикоят қилгани, унга қарши кўрсатма берадиган шахслар борлигини айтган.

— Терговчи устимдан 15 та ариза тушганини айтиб, кеч соат 22:00 гача ушлаб турди. Соат 22:00 атрофида адвокатим Озода Мухторова келди. Терговчи Санъат Одилов аввалдан тайёрланган менга таниш бўлган икки киши, яъни мен яқиндан танийдиган Бахтиёр Сирожов ва ўзимнинг жигарим, катта акам Санжар Бурҳонов томонидан менга асоссиз айбловларни қўйишди, — дейди Шерзод Бурҳонов.

Маълум бўлишича, Шерзод Бурҳонов 2012 йилда Бахтиёр Сирожовнинг отасидан «Алмаз золотой» ресторанининг ярмини, яъни 29-«А» уйни 120 минг долларга сотиб олган. 2016 йилда ушбу ташландиқ жой ўрнида «Алмаз золотой дворец» ресторани қурилган. Орадан 4 йил ўтган, 2012 йил 20 июль куни Самарқанд шаҳар, Беруний кўчасида жойлашган 11-сон давлат нотариал идорасининг нотариуси Мубин Жўраев тасдиқланган, давлат кадастрига эга ҳужжатлар бўлса-да, Бахтиёр Сирожов келиб 120 минг долларни олмаганлигини маълум қилган. Натижада терговчи томонидан 168-модда билан айблов қўйилган.

— Иккинчи аризачи — ўзимнинг акам Санжар Бурҳонов кимгадир пора бермоқчи бўлганлигимни баён қилган. Яъни 211-модда бўйича кўрсатма берган. 211-модда бўлганда аниқ 210-модда бўлиши керак эди. Бироқ акамнинг «номаълум бўлган қандайдир мансабдор шахсга пул обориб бердим», деган кўрсатмаси асосида тергов жараёнида терговчи менга 28 орқали 211-модда билан айб қўйишни уддасдан чиқди, — дейди Шерзод Бурҳонов. — Шу билан Санъат Одилов ўша кунги терговни тугатиб, мени вақтинчалик сақлаш ҳибсхонасига юборди.

Шерзод Бурҳоновнинг таъкидлашича, у терговчи Санъат Одиловнинг дастлабки сўроғидан кейин 2 ой давомида қамоқда сақланган. 2 ойдан сўнг терговга олиб келиниб, юқорида қайд этилган 168 ва 211-моддадан ташқари яна 6 та модда асосида айблов борлиги билдирилган.

— Санъат Одилов «яна 6 та модда қариндошларингиздан сизга совға. Югурганингизнинг фойдаси йўқ, барибир қамаласиз. Буни орқасида қанақанги куч турганини тасаввур ҳам қилолмайсиз. Мен шунчаки топшириқни бажарувчи аскарман. Қандай бўлишидан қатъий назар, сизга 8-9 та модда қўйилади. Шунда ҳам агар суддан қуруқ чиқсангиз, барибир бошқа айб қўямиз. Гап битта, сиз қамаласиз. Рад этасизми, терговдаги хулосаларга қўл қўймайсизми, сизни мажбурлаймизми, фарқи йўқ. Шунинг учун қамалишга тайёр бўлинг» деб айтди, — дейди Шерзод Бурҳонов. — Менга дўқ-пўписа қилиб, қамалишимдан ташқари қўлимдаги мол-мулклар, «Алмаз золотой дворец» ва «Алмаз плаза» ресторани, 200 киши ишлайдиган «Мастура Алмаз бахмал» ишлаб чиқариш корхонаси, шунингдек, бировларга тегишли бўлган 6 та автомобилнинг (2 та Captiva, 1 та Malibu, 3 та Mazda) ҳаммаси мусодара бўлишини айтди. Мен эса «Майли, нима қилсангиз қилинг. Бу сизларнинг қўлларингизда бўлса, марҳамат» дедим.

— Шундан сўнг мени қамоққа юборишди. Орадан 10-15 кун ўтиб яна терговга олиб келишди. Санъат Одилов яна ўша гапларини такрорлади. Бунинг ортида Самарқанд вилоятининг ўша пайтдаги прокурори Боҳодир Деҳқонов, унинг орқасида яна бир катта одам, яъни Миллий хавфсизлик хизматининг биринчи ўринбосари Шуҳрат Ғуломов турганлигини айтди. Мен унинг фамилиясини кейинроқ билдим, — дейди Шерзод Бурҳонов.

Шерзод Бурҳоновнинг айтишича, ҳали айблов қўйилмасдан, тергов қандай тугашидан қатъий назар, қамалиши аниқ бўлган. Терговчи суд жараёни бошланмасдан уни 12 йил 6 ой муддатга қамалишини, қолаверса, мол-мулклари мусодара бўлишини айтган.

— Иш судга ошганидан сўнг Жиноят ишлари бўйича Самарқанд шаҳар суди судьяси Баҳодир Алиқулов ишни олиб борди. Тошкентдан икки нафар, Самарқанддан уч нафар адвокат иштирок этиб, ҳар бир ҳужжатларни асослантириб кўрсацак ҳам у судни бир томонлама олиб борди, — дейди Шерзод Бурҳонов. — Ҳаттоки бировлар мулки бўлган 6 та автомобиль эгалари судга келиб машиналарини қайтариб беришини, уларнинг менга алоқаси йўқлигини айтишига қарамасдан, ҳатто суд жараёнига қабул қилмасдан автомобилларни мусодара қилиб юборди.

«Алмаз золотой дворец» ресторани Фарида Бурҳонованинг номига расмийлаштирилган бўлиб, ресторан унинг мулки ҳисобланади. Фарида Бурҳонова ресторанни бошқа бир шахсга ижара шартномаси асосида берган. Текширувдан сўнг гарчи ижара шартномасида келтирилган давлат солиқларини тўлаган бўлса-да, аммо барибир ресторан мусодара қилиб юборилган.

— Бўйнимга туҳмат билан ҳеч қандай исботсиз 1 миллиард 600 миллион сўмлик қарздорликни илиб қўйди. Аммо мусодара қилишда «Алмаз золотой дворец» ресторанини 4,5 миллиард сўмга нархлаб мусодара қиляпти. Бундан ташқари, бировларга тегишли бўлган 900 миллион сўмлик 6 та автомашинани ҳеч қаерга кўрсатмасдан мусодара қилиб юборди, — дейди Шерзод Бурҳонов. — Судда судьяга ўша пулларни тўлашимни тушунтирдим. Аммо бировларнинг мол-мулкига тегмаслиги, уларни мусодара қилмаслигини айтганимда «йўқ, бу нарса тепадан буюрилган» деб айтди. Қизиқ жиҳати, терговчи Санъат Одилов ҳам тергов пайтида мол-мулким мусодара бўлиши айтганди.

Мусодара қилинган мулк эвазига 4,5 миллиард сўмдан 1 миллиард 600 миллион сўм давлатга келтирилган зарар учун тўланган экан. Қолган пул қаерга кетди? 6 та автомобилнинг пуллари-чи? Қайси ҳисоб рақамига ўтиб кетди? Ҳозирга қадар ҳеч кимга бу нарса аниқ эмас.

— Бу туҳматлар ҳасад туфайли менга яқин бўлган ўртоқларим томонидан амалга оширилди. Мен уларни олдиндан ҳам танир эдим. Бунинг буюртмачилари ўзини тадбиркор деб билган Аҳмад Раҳимов ва Зафар Бурҳонов бошчилигида Санжар Бурҳонов, Бахтиёр Сирожов ҳамда Умид Мансуров бўлган, — дейди Шерзод Бурҳонов.

Шерзод Бурҳоновнинг айтишича, Умид Мансуров аслида АҚШда ишлаб юрган. 2016 йилнинг 29 июль куни қамоққа олинганидан сўнг уни АҚШдан Аҳмад Раҳимов ва Зафар Бурҳонов чақириб олиб, унга қарши кўрсатма берган. Натижада терговчи 165-модда 2-қисм, яъни товламачилик айбини қўйган.

— Гўёки мен 2014 йилда уни қўрқитиб, 15 минг доллар пулини олган эканман. Аслида эса бундай воқеа бўлмаган. Яна туҳматлар қилиб, тергов жараёнида тушунтириш хати ёзиб, мен билан юзлаштирув терговини ўтказмасдан АҚШга қочиб кетди. Мен судда ҳам Умид Мансуров билан юзлаштиришларини сўрадим. Чақиринглар дедим. Аммо бу илтимосимни судья Баҳодир Алиқулов бажармади. Судья Умид Мансуровнинг сўзлари рост деб, АҚШдан қанақадир қоғоз келганини айтиб, 165-модда 2-қисм билан 3 йил муддат қўшилди. Мана шунақа деди-деди, айтди-айтдилар билан мени 12 йил 6 ойга қаматиб юборди, — дейди Шерзод Бурҳонов.