2019 йилнинг биринчи ярим йиллигида Ўзбекистонда иш билан банд аҳолининг норасмий сектордаги улуши 1,1 фоизга пасайиб, жами меҳнат ресурсларининг 58,2 фоизини ташкил этди. Бу ҳақда Европа ва Марказий Осиё давлатлари иқтисодининг 2019 йил кузидаги ҳолати бўйича Жаҳон банки томонидан эълон қилган ҳисоботда маълум қилинган.
Фото: Sputnik
Мазкур ҳолат, яъни норасмий секторда ишлаётганлар сонининг камайиши Ўзбекистон тарихида биринчи марта рўй бермоқда.
Ҳисоботда қайд этилишича, жорий йилнинг биринчи ярмида Ўзбекистон иқтисодиётида кузатилган ўсиш, асосан, инфратузилма ва саноатга киритилган инвестициялар ҳажмининг ўсиши билан боғлиқ.
«Асосий савдо ҳамкорларининг иқтисодий ҳолати бўйича прогнозлар унчалик ҳам ижобий бўлмаса-да, Ўзбекистон иқтисодининг ўрта муддатдаги истиқболи юзасидан тахминлар ижобийлигича қоляпти ва бу кенг кўламли ислоҳотларнинг давом этаётгани билан изоҳланади», — дейилади Жаҳон банки ҳисоботида.
Таъкидланишича, иқтисодий ўсиш натижасида мамлакатдаги расман тан олинган қашшоқлик даражасининг бироз пасайиши кузатилган. Жумладан, 2017 йилда Ўзбекистоннинг 11,9 фоиз аҳолиси қашшоқ саналган бўлса, 2018 йилга келиб бу кўрсаткич 11,4 фоизга тушган. Шундай бўлса-да, ҳукумат келтирган бу расмий статистик маълумотлар ностандарт методлар билан ҳисоблаб чиқилган.
Прогнозларга келганда, Жаҳон банки Ўзбекистон ЯИМ 2019—2020 йилларда 5,6 фоиз атрофида ўсишини, 2021 йилга бориб эса ўсиш суръати 6 фоизга етишини тахмин қилган.
«Ўзбекистон иқтисодиёти учун асосий хавф – глобал иқтисодий ҳолатнинг беқарорлашуви эҳтимолидир. Боиси мамлакатнинг, айниқса, асосий савдо ҳамкорлари ташқи рисклар қаршисида турибди.
Ички риск омилларидан эса кредитлаш суръатининг юқорилиги бу монетар сиёсатнинг самарадорлигини пасайтириб, молия секторининг барқарорлигига салбий таъсир қилишини келтириш мумкин. Қолаверса, давлат қарамоғидаги корхоналар, банк сектори, қишлоқ хўжалиги ва ерга эгалик соҳасидаги ислоҳотларнинг кейинги босқичини ҳам эҳтимолий ички рисклар қаторига киритиш мумкин», — дейилади ҳисоботда.
