Туркманистонда Ашхободнинг энг обрўли тадбиркори Чаримуҳаммад Кулов (Чари-Гоша) ҳибсга олинди, деб хабар беради Fergana News.

Фото: Fergana News

Норасмий манбаларда тарқалган ушбу маълумотни мамлакат бош прокурори Батир Атдаев тасдиқлаган.

13 сентябрь куни ҳукумат йиғилишида нутқ сўзлаган Батир Атдаевнинг сўзларига кўра, тадбиркор бир нечта мансабдор шахслар билан «давлат мулкини жуда катта миқдорда талон-торож қилиш» юзасидан келишувга эришган.

«Turkmen.News» нашри Куловни Ашхободнинг энг обрўли ва бой тадбиркорларидан бири деб атайди. Манбаларнинг қайд этишича, у икки ҳафтача олдин ҳибсга олинган.

Нашрга кўра, сентябрь ойининг бошида йирик мансабдор шахсларнинг, хусусан, Туркманбоши нефтни қайта ишлаш мажмуаси бош директори Язмурад Муҳаммадмуродов ва савдо вазири Амандурда Ишановнинг истеъфога чиқарилиши ушбу ҳибс билан боғлиқ.

Чаримуҳаммад Кулов ва унинг шериклари, хусусан, нефть-газ ва кимё маҳсулотларини арзон нархларда сотиш билан боғлиқ фирибгарликда айбланган. Бундан ташқари, унга қурилиш материаллари савдоси ва чет элга катта миқдордаги нақд пулни ноқонуний олиб чиқиш режалари бўйича солиқларни тўламаганлик айби қўйилган.

Ҳамма фигурантларга қарши жиноий иш қўзғатилган, уларнинг мол-мулки ҳибсга олинган.