Футбол бўйича Ўзбекистон терма жамоаси бош мураббийи аргентиналик мутахассис Эктор Купер лавозимидан кетади ва бу борада тез орада расман эълон қилинади, деб ёзмоқда «Kun.uz».
Маълум қилинишича, мамлакат бош жамоаси ЖЧ—2022 иккинчи саралаш босқичини Фаластинга қарши мағлубият билан бошлаганидан сўнг Ўзбекистон футбол ассоциацияси раҳбарияти мураббийни ишдан олиш фикрига келган.
Мавзуга доир: Эктор Купер ишдан кетиб, Вадим Абрамов Ўзбекистон терма жамоасига бош мураббий бўладими? Асосий маълумотлар
Таъкидланишича, эндиликда терма жамоа бош мураббийи лавозими учун икки номзод кўриб чиқилмоқда: 2017 йилдан буён «Пахтакор»да ишлаётган Шота Арвеладзе ва ҳозирда «Бунёдкор»ни бошқараётган Вадим Абрамов.
Эслатиб ўтамиз, аввалроқ ташкилот расмий вакиллари билан «Дарё» боғланганда Купернинг истеъфога чиқарилиши ва унинг ўрнига Вадим Абрамовнинг олиб келиниши «шунчаки гап-сўз» дея таърифланганди.
Бундан ташқари, ЎФА биринчи вице-президенти Равшан Эрматов бошқа бир маҳаллий ОАВга Эктор Купернинг терма жамоа рулидан кетмаслигини маълум қилган.
Мавзуга доир: Эктор Купернинг Ўзбекистондаги сафари ҳам қариди(ми?)
Хабарга кўра, Купернинг йиллик маоши миқдори 2 миллион евро атрофида. Айни вақтда мураббий билан шартнома муддатидан олдин бекор қилиниши учун қанча миқдорда компенсация тўланиши кераклиги бўйича аниқ маълумот йўқ. Манбанинг тасдиқлашича, компенсация миқдори шартноманинг қолган муддати учун белгиланган маош миқдоридан анча кам бўлади.
Эслатиш жоиз, Ўзбекистон футболи тарихида мураббийлар учун берилган энг катта маош бразилиялик Луис Фелипе Сколарига тегишли. У 2009—2010 йилги мавсумда Тошкентнинг «Бунёдкор» жамоасида йилига 12 миллион доллар атрофида маош олган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)