Ўзбекистон Мудофаа вазирлиги ҳарбий делегацияси ҳарбий кадрларни тайёрлашда ҳамкорлик бўйича АҚШга ташриф буюрди

Ўзбекистон Мудофаа вазири ўринбосари генерал майор Азизбек Икромов бошчилигидаги ҳарбий делегация ҳарбий таълим соҳасидаги икки томонлама алоқаларни янада ривожлантириш, шунингдек, ҳар икки мамлакат ҳарбий таълим муассасалари ўртасидаги ўзаро ҳамкорлик истиқболларини муҳокама қилиш мақсадида АҚШга ташриф буюрди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.

Ўзбекистоннинг АҚШдаги элчихонаси маълумотига кўра, ташриф доирасида 9 сентябрь, душанба куни генерал майор Азизбек Икромов АҚШ Миллий мудофаа университети президенти, вице-адмирал Фриц Ругге билан учрашган. Ўзаро мулоқот мобайнида олий бўғин офицер кадрларини тайёрлаш, шунингдек, ҳарбий тадқиқотлар ўтказиш борасида ўзаро ҳамкорликни йўлга қўйишдан ҳар икки томон ҳам манфаатдор эканлиги таъкидлаб ўтилди. Томонлар кенг кўламли масалалар ва АҚШ Миллий мудофаа университети ҳамда Ўзбекистон Қуролли Кучлари академияси ўртасида ўзаро ҳамкорлик йўналишлари бўйича фикр алмашди.

Ўзбекистон делегацияси университет инфратузилмаси, ҳарбий кадрлар тайёрлашга ёндашувнинг умумий тизими, шунингдек, профессионал ҳарбий таълимнинг муайян курслари учун мўлжалланган ўқув дастурларини ишлаб чиқиш принциплари билан танишди.

Шу куннинг ўзида делегацияси вакиллари Яқин Шарқ ва Жанубий Осиё Стратегик тадқиқотлар маркази (NESA) директори, истеъфодаги генерал-лейтенант Томас Вулф билан учрашди. Томонлар минтақавий хавфсизлик соҳасида тадқиқотлар ўтказиш масалалари бўйича ҳамкорликни янада чуқурлаштиришдан ўзаро манфаатдор эканлигини таъкидлаб ўтди.

10 сентябрь, сешанба куни Миссисипи штатидан АҚШ Конгресси Вакиллар палатаси аъзоси Трент Келли, шунингдек, АҚШ Мудофаа вазирлиги вакили Амер Латиф билан учрашувлар бўлиб ўтди. Ўзаро мулоқот давомида томонлар ўзаро ҳамкорликнинг бугунги ҳолати ва уни янада ривожлантириш йўналишлари бўйича фикр алмашди.

Ўзбекистон делегацияси аъзолари 11—13 сентябрь кунлари Пенсильвания штатининг Карлайл шаҳрида жойлашган АҚШ Қуруқликдаги қўшинлари Ҳарбий коллежига ташриф буюради.