Жорий йилнинг 23 август куни SizdanTelegram Telegram-канали орқали эълон қилинган «Фарғона МИБ бехабарлиги туфайли тўланмаган алимент» юзасидан расмий баёнот берилди. Бу ҳақда Мажбурий ижро бюроси матбуот хизмати хабар қилади.
Фуқаролик ишлари бўйича Фарғона туманлараро судининг 2018 йилнинг 3 мартидаги қарздор У. Жўраевдан З. Жўраева фойдасига 1/3 қисм миқдорида алимент ундириш ҳақидаги ижро ҳужжати Бюронинг Қува тумани бўлимига 12 мартда келиб тушган.
Ижро ҳужжати Бюрога келиб тушгунига қадар қарздор У. Жўраев Қозоғистон Республикасига ишлагани кетганлиги аниқланиб, бу ҳақида 2018 йилнинг 18 апрель куни далолатнома расмийлаштирилган, 2019 йилнинг март ойига қадар 1 йил давомида алимент тўловлари амалга оширилмаган.
Алимент қарзи қайта ҳисобланиб, қарздор алимент қарзини тўламаганлиги сабабли унга нисбатан тўпланган ҳужжатлар Бюро томонидан маъмурий судга тақдим қилинган.
Қува тумани маъмурий судининг 2019 йил 11 март кунидаги қарорига кўра, қарздор У. Жўраевга 5 302 666 сўм алимент қарзини тўламаганлиги сабабли У. Жўраевга нисбатан Ўзбекистон Республикаси МЖтКнинг 47-4-моддасига асосан 15 сутка маъмурий қамоқ жазоси тайинланган.
Жазони ўтаб чиққан қарздор У. Жўраев кейинчалик ҳам алимент қарзини тўламасдан келганлиги сабабли 2019 йил 20 май куни давлат ижрочиси томонидан қарздорнинг яшаш манзили ўрганилган ва уни ижро ҳужжатида кўрсатилган манзилда яшамаётганлиги, МФЙнинг маълумотида қарздор У. Жўраев 2019 йил май ойи бошида Қозоғистон Республикасига ишлаш учун кетганлиги аниқланган. Лекин давлат ижрочиси Н. Исломов қарздорга нисбатан Ўзбекистон Республикасидан четга чиқиш ҳуқуқларини чеклаш ва қидирув эълон қилиш чораларини кўрмаган.
Давлат ижрочиси Н. Исломов бошқарма бошлиғининг 04.06.2019 йилги буйруғига асосан лавозимидан озод этилиб, Бюро хизматидан бўшатилган.
Қарздорнинг алиментдан қарзи 2019 йил 1 август кунги ҳолатига кўра, 6 512 666 сўмни ташкил қилиб, ушбу қарздорликни ундириш мақсадида 19 август куни қарздорнинг яшаш хонадони бўлган Қува тумани, М.Ҳасанов номидаги МФЙ, А. Қодирий кўчаси ўрганилганда қарздор Қозоғистон Республикасига ишлаш учун чиқиб кетганлиги ва уйида эмаслиги яқин қариндошлари орқали аниқланган. Бу ҳақда МФЙ иштирокида далолатнома расмийлаштирилган.
Юқоридагиларга кўра, шу куни давлат ижрочиси томонидан қаздорнинг четга чиқиш ҳуқуқларини чеклаш ҳамда унга нисбатан қидирув эълон қилиш ҳақида қарор қабул қилиниб, ижросини таъминлаш учун Бюронинг ахборот таъминоти ва қидирув бўлими ҳамда туман ИИБга қарорлар тақдим қилинган. Ҳозирда қарздорга нисбатан қидирув эълон қилинган.
Изоҳ (0)