Joriy yilning 23-avgust kuni SizdanTelegram Telegram-kanali orqali e’lon qilingan “Farg‘ona MIB bexabarligi tufayli to‘lanmagan aliment” yuzasidan rasmiy bayonot berildi. Bu haqda Majburiy ijro byurosi matbuot xizmati xabar qiladi.
Fuqarolik ishlari bo‘yicha Farg‘ona tumanlararo sudining 2018-yilning 3-martidagi qarzdor U. Jo‘rayevdan Z. Jo‘rayeva foydasiga 1/3 qism miqdorida aliment undirish haqidagi ijro hujjati Byuroning Quva tumani bo‘limiga 12-martda kelib tushgan.
Ijro hujjati Byuroga kelib tushguniga qadar qarzdor U. Jo‘rayev Qozog‘iston Respublikasiga ishlagani ketganligi aniqlanib, bu haqida 2018-yilning 18-aprel kuni dalolatnoma rasmiylashtirilgan, 2019-yilning mart oyiga qadar 1 yil davomida aliment to‘lovlari amalga oshirilmagan.
Aliment qarzi qayta hisoblanib, qarzdor aliment qarzini to‘lamaganligi sababli, unga nisbatan to‘plangan hujjatlar Byuro tomonidan ma’muriy sudga taqdim qilingan.
Quva tumani ma’muriy sudining 2019-yil 11-mart kunidagi qaroriga ko‘ra, qarzdor U. Jo‘rayevga 5 302 666 so‘m aliment qarzini to‘lamaganligi sababli U. Jo‘rayevga nisbatan O‘zbekiston Respublikasi MJtKning 47-4-moddasiga asosan 15 sutka ma’muriy qamoq jazosi tayinlangan.
Jazoni o‘tab chiqqan qarzdor U. Jo‘rayev keyinchalik ham aliment qarzini to‘lamasdan kelganligi sababli, 2019-yil 20-may kuni davlat ijrochisi tomonidan qarzdorning yashash manzili o‘rganilgan va uni ijro hujjatida ko‘rsatilgan manzilda yashamayotganligi, MFYning ma’lumotida qarzdor U. Jo‘rayev 2019-yil may oyi boshida Qozog‘iston Respublikasiga ishlash uchun ketganligi aniqlangan. Lekin davlat ijrochisi N. Islomov qarzdorga nisbatan O‘zbekiston Respublikasidan chetga chiqish huquqlarini cheklash va qidiruv e’lon qilish choralarini ko‘rmagan.
Davlat ijrochisi N. Islomov boshqarma boshlig‘ining 04.06.2019-yilgi buyrug‘iga asosan lavozimidan ozod etilib, Byuro xizmatidan bo‘shatilgan.
Qarzdorning alimentdan qarzi 2019-yil 1-avgust kungi holatiga ko‘ra, 6 512 666 so‘mni tashkil qilib, ushbu qarzdorlikni undirish maqsadida 19-avgust kuni qarzdorning yashash xonadoni bo‘lgan Quva tumani, M.Hasanov nomidagi MFY, A. Qodiriy ko‘chasi o‘rganilganda qarzdor Qozog‘iston Respublikasiga ishlash uchun chiqib ketganligi va uyida emasligi yaqin qarindoshlari orqali aniqlangan. Bu haqda MFY ishtirokida dalolatnoma rasmiylashtirilgan.
Yuqoridagilarga ko‘ra, shu kuni davlat ijrochisi tomonidan qazdorning chetga chiqish huquqlarini cheklash hamda unga nisbatan qidiruv e’lon qilish haqida qaror qabul qilinib, ijrosini ta’minlash uchun Byuroning axborot ta’minoti va qidiruv bo‘limi hamda tuman IIBga qarorlar taqdim qilingan. Hozirda qarzdorga nisbatan qidiruv e’lon qilingan.